Shillong, Nailur 14: Haduh 200 ngut ki nongiakop mareh ba wan na ki 9 tylli ki Jylla ka Ri kynthup ia 60 na Bangladesh kin wan ban iashimbynta ha ka half marathon ka ban pynlong ha ka shnong ba khuid tam ka dewbah Asia, ka Mawlynnong.
Kane ka jingiakop mareh marathon ka dei kaba la pynlong da ka Real Sports India ban kyntiew ia ka kam jngohkai pyrthei bad ruh ban pynsaphriang ia ka khubor pyrshah ia u droks bad kiwei kiwei.
Kane ka jingiakop mareh kan kynthup ia ka 21.1 kilometer, nangta kaba 12 meter bad ruh kaba 5 kilometer, ka ban sa pynlong ha ka 17tarik mynta u bnai.
Na ki nongshim bynta, kawei ka longkmie ba la 74 snem ruh kan shim bynta ha ka mareh ba 21.1 KM bad u heprit ba khynnah tam ba dang 4 snem ka rta pat un shim bynta ha ka jingiakob mareh ba 5 KM. Nalor kine kin don ruh ki nongmareh ba don jingthut ha ka dkhot met kiba la pyntikna ba kin ia shim bynta.
Katei ka jingiakob mareh kan sdang na ka jaka ieng kali jong ka shnong Mawlynnong naduh ka por 6:00 baje mynstep.
La pyntip ruh ba na ka bynta ki nongleit shim bynta kan don ka bos na bynta jong ki kaban mih na Shillong ban leit sha Mawlynnong ha ka 16tarik ha ka por 1:30 baje ei ei janmiet bad kan wanphai pat ha ka 17tarik hi.
