Nongpoh Risaw 22: Ka lympung iakop rwai bad shad ba la tip kum ka Ri Bhoi Superstar Season-1 ka la jam sha ka phainal ha kaba kin don kumba 20 ngut ki samla donsap ha ka rwai bad shad, ki ban iaknieh ban rah ia ka nam lahduh ha u bnai Nohprah 2023 ha Umsning Auditorium.
Lah ban kdew, kane ka jingiakop rwai bad shad ka long shibynta ban ai rynsan ia ki samla donsap.
Ha ka jingiakhun ia ka semi final kaba la long ha ka 21 tarik u Risaw ha District Library Nongpoh, ki nongbishar ki la jied ia ki 20 ngut ki samla kiban ia knieh pat ia ka nam lahduh.
Ha ka jingiakhun ia ka semi final, la wan ai mynsiem ia ki samla donsap da u Bah Bajop Pyngrope, MDC ka Rymbai Jyrngam Konstituensi kum u kongsan ha ka jingiadonlang ruh u Raja Brahma, Additional Deputy Commissioner, u Bah Pyndaplang Wahlang, President ka NPYF, Ri Bhoi District, u Bah Lansius Syiemlieh, u ba dei u nongpyniaid jong ka Ri Bhoi Superstar Season-1 nalor kiwei kiwei.
Na ka liang u Bah Bajop Pyngrope, u la pynpaw ia ka jingkmen ban sakhi lang ia ka sap ka phong ki samla na Ri Bhoi District, kiba la wan shakhmat ban pyni ia la ki sap ki phong ha ka kam rwai bad shad.
U la ai ka jingiaroh ia ki nongpyniaid jong ka Ri Bhoi Superstar kiba la iohi jngai ban ai ia ka rynsan kaba kum kane ban ailad ia ki samla donsap ba kin wan shakhmat ban pynpaw paidbah ia la ka sap bad ruh ban pynkiew ha ki sap jong ki.
