Ka sien ba nyngkong ha WKH ban leit lang tang kawei ka kynhun: Sangriang
Nongstoiñ, K’lyngkot 8: Haduh 183 ngut ki rang bad ki thei ialehkai na ki 11 tylli ki synjuk ialehkai kin mihkhmat ia ka West Khasi Hills District Sports Association sha ka lympung ialehkai 5th Meghalaya Games 2024 ka ban long ha Tura naduh ka 15 tarik K’lyngkot.
Ka Coordination Committee of West Khasi Hills District 5th Meghalaya Game 2023-24, ka la pynlong ia ka jingiakynduh lang hynne ka sngi Nyngkong ha TRYSEM Hall jong ka ophis jong u Deputy Commissioner, ai khublei ia baroh ki rang bad thei ialehkai ki ban mihkhmat ia ka District.
Ia katei ka jingiakynduh lang la pyniaid da u Dr.L Mawsor ha ryngkat ka jingdonlang jong u bah Garod L.S.N Dykes IAS Deputy Commissioner u ba dei u Chairman ka Committee.
Kiwei ki kynthup u Bah G.J.L Sangriang Chef de Mission, u Bah A.Nongrem Assistant CDM, ka ong D.Syiem DSO kaba dei ka Vice Chairman jong ka Committee bad ki athletes na ki khatwei tylli ki kynhun ialehkai ki ban sa leit ban ia shim bynta ha ka lympung.
Na ka liang ka Committee ka phah ruh ia ka jingai khublei bad ka kitbok kitrwiang ia ki rang bad ki thei ialehkai ba kin lah ban wanrah ia ka nam ka burom ia ka District.
U Bah Garod L.D.N Dykes IAS Deputy Commissioner u ba dei ruh u Chairman ka Committee, ula kyntu ia ki nongialehkai ba kim dei ban don ka jingsngewiapher jaitbynriew ne jingsngewiapher shnong ne jaka, hynrei ki dei ban don ka jingsngew ryngkat kyrdan bad ia sngew kum shi para.
Nalor kata u la ong ba haba ki iashim bynta ha ki jingialehkai bapher bapher kim dei ban sngew rit mynsiem, hynrei ki dei ban don ia ka thong ba ki pynpoi sha ka jingjop khnang ba kin wan rah ia ja nam na ka bynta ka District.
Na ka liang ki nongialam jong ki kynhun ialehkai bapher bapher ki la pynpaw ia ka jingsngew nguh kaba khraw ia u Deputy Commissioner, u ba la shim ia kane ka sien jam ban ia don bynta lang ha kaba kyrshan ia ki samla ialehkai jong ka district, ha kaba kum kane ka por.
Ha katei ka jingialang la pynsngew ruh ba ha ka 12 tarik kan don ka jingrah ia ka dong musa ka ban sdang na Anderson Higher Secondary School haduh NRL petrol pump Nondeiñ, ha kaba san phew ngut ki nongialehkai na ki kynhun bapher bapher kin ia shim bynta ban rah ia katei ka dongmusa.
