Shillong, Nohprah 01 : Ka Ministry of Jal Shakti kala pyntip ba ka thain Shatei Lam Mihgi ka Ri India kala ai jingujor haduh 1640 tylli kiba iadei bad ka jingpyndonkam bakla ia ka pisa bad ka jingtrei tang dep ia ki kam hapoh ka Jal Jeevan Mission (JJM).
Napdeng kane, haduh 8 tylli ki jingujor ia ka jingpyndonkam bakla ia ka skhim ka dei ha Meghalaya bad haduh 3 ngut ki heh ophisar/ Engineer kila ngat ha ka jingpynshitom.
Kane ka long kat kum ka jingkhein bala wanrah da u Myntri Khynnah ka Ministry of Jak Shakti V. Somanna ha ka jubab da ka jingthoh hapoh ka Iingdorbar Rajya Sabha hynne ka sngi Nyngkong.
Kat kum ka jingong jong u, ka jingdon ki jingujor bala iohpdiang na ki 32 tylli ki Jylla bad Union Territories ka Ri baroh kawei, kala kot sha ka 17,036 tylli. Kine ki jingujor kila mih lyngba ki khubor ha ki lad pathai khubor, ki nongmihkhmat paidbah, ki grievance portal, ki jingleit jurip hi dalade bad kiwei kiwei.
Watka ka Uttar Pradesh ka kot jan 84% na ki jingujor ha ka ri baroh kawei, ka jingkhein ba ioh na ka thain Shatei Lam Mihngi ka pynpaw ia ka jingduna kiba bun ha ka jingai khubor, ka jingkhmih ia ka jingtrei bha ia ka kam bad ka jingpyn shitom ia kiba pyndonkam bakla.
Na ki Jylla ka thain Shatei Lam Mihngi, ka Assam marwei ka don haduh 12,36 tylli ki jingujor-kaba pynbor ban ai jingpyn shitom pyrshah ia 17 ngut ki Heh Ophisar ka Tnad, 4 ngut ki Contractor bad lai tylli ki Third Party Inspection Agency.
Ki jingujor ki kynthup ia ka jingpyndait ia ki pipeum kiba tad dor, ka jingbym pyndep ia ka jingpyndait kor um, ka jingpyn slem ban plie ia ka skhim bad ka jingkynnoh pyndonkam bakla ia ka pisa.
Ka Tripura ka don haduh 376 tylli ki jingujor bad haduh 376 ngut ki contractor kila shah pynshitom. Ha Manipur ki don haduh 19 tylli ki jingujor hynrei la pynshitom tang ia 4 ngut ki heh Sorkar bad 39 ngut ki contractor.
Ka Meghalaya kala register ia 8 tylli ki jingujor bad la pynshitom tang ia 3 ngut ki heh Ophisar/Engineer. Ka Mizoram ka don tang kawei ka jingujor katba ka Arunachal Pradesh bad Sikkim haduh mynta kim pat ioh pdiang ia ki jingujor.
.){kind=link}