Shillong, K’lyngkot 22 : U Myntri Sorkar Bah Sanbor Shullai u pyntip ba u Myntri Rangbah ka Jylla Conrad K Sangma bad u Symbud Myntri Rangbah Bah Prestone Tynsong, kin sa lum ia ka jingialang ba kyrpang hadien ka Republic Day ban kren ia kiba bun ki kam ba iadei bad ka jingpynroi ia ki jingtei bala pynsngew hakhmat ki Myntri ka Sorkar Pdeng.
“Nga la pyntip ia u CM halor ka jingleit jong nga sha New Delhi bad iakynduh ia ki Myntri ka Sorkar Pdeng. Hadien ka Republic Day, u CM bad DyCM kin sa lum ia ka jingialang ba kyrpang ban iakren ia ki mat bala pynsngew ha Delhi” ong u Bah Sanbor haba iakren bad ki nongthoh khubor ha ka sngi Palei.
U Bah Sanbor dang shen, ula ialam ia ka kynhun ki nongialam ka BJP na Jylla bad iakynduh ia ki Myntri ka Sorkar Pdeng ba kynthup ia u Myntri kam iada ri Rajnath Singh, ban leh eiei halor ka kam pynkynriah ia ki jaitbynriew Dalit Sikh na Them Iew Mawlong, pyntreikam ia ka Building Bye-law, bad ka jingshim ia ka jaka ki shipai na ka bynta ka Shillong Flyover Project na Jhalupara sha Barik Point.
“Ngi la pynsngew ha u (Rajnath) ia kine ki jingeh kiba hap hapoh ka cantonment area, bad ula pynpaw ia ka jingkmen kaba khraw” ong u Bah Shullai haba bynrap ba u Myntri kam iada ri ula kular ba un sa shimkhia hi shimet ban pynbeit ia kine ki jingeh.
U Bah Sanbor ula iakynduh ruh ia u Myntri ka Ministry of Road Transport & HighwayNitin Gadkari, uba la kular ban pynsted noh ia ka jingai jaka na ka bynta ka project flyover.
“Kumta, ryngkat lang kum ka Sorkar MDA ngin sa leit iakren ia ka Sorkar Pdeng ba kan leh eiei halor kine ki kam” ula ong.
Kiwei pat ki kam bala iakren ki kynthup ia ka jingshna bha ia ka madan ialehkai ha Contonment, ka jingshna ia ka iew ki nongshong dukan madan, bad ka jingpynneh pynsah ia ka kolshor ki trai ri trai muluk nalor ka Traditional Complex ha Mawlai.
Haba kylli, u Bah Sanbor ula ong ba ka jingkhapngiah ki surok ha Shillong la khmih lynti ba kan sa kham duna noh shen da ka jingtyrwa ia ka project flyoer na Mahavira Park, Jhalupara sha Barik Point.
“Ka project, hadien bala pyndep, kan pynduna ia ka jingkhapngiah ka leit ka wan ki kali ha sor Shillong” ong u Bah Sanbor haba iathuh ba ka jingtyrwa haba nyngkong ka kynthup ia ka flyover naduh Mahavira Park haduh Anjalee Petrol Pump, hynrei hadien la pynwan noh haduh ba kut ka Barik Point.
U Bah Sanbor ha ka jingiakynduh ia u Rajnath Singh, ula pynpaw ruh ia ka jingdonkam ban ioh ia ka jaka ki shipai hajan ka Ophis ka NCC bad ka madan Garison. U iathuh ba u Singh ula kyrpad ban ai khubor man ka por halor kine ki kam.
“U Singh ula kyrpad ia nga bad ia ka party BJP ba ngin wan man u bnai ban pynkynmaw ia u halor kine ki jingeh jong ki nongshongshnong ka sor Shillong bad ka Jylla” ong u Bah Sanbor haba pynpaw ia ka jingkyrmen ba yn sa lah pynbeit noh ia kine ki kam hapoh ka hynriew ne hynniew bnai.
