Hadien ba kem ia u Heh HNYF, kyndit bynriew ki Tnad Sorkar, shah bat lut ki trok kit mar ha Lad Umroi

Kyndit bynriew ka Tnad Bording

Shillong, Naiwieng 03 : “Ha man ki kam ba leh kin don bad mih beit kiei kiei” (for every action there is a equal and opposite reaction), kala jia mynta hadien ka jingkem ia u Heh ka seng Hynniewtrep National Youth Front (HNYF) ba lum pisa be-ain na ki trok kit mar bad kane kala paw na ka jingshah bat lut ki trok kit mar kynthup ki marbam mardih kiba dei ban wan sha Shillong ha Lad Umroi, Umiam.

Kine ki trok ki dei kiba shah bat ha ki Motor Vehicle Inspector (MVI)ka Tnad Transport ka Jylla, kiba la pyntreikam pyrrkhing ia ka hukum jong ka Tnad Bording ba mana bad buh da u pud ban shah ia ki kali kit mar ba kin iaid nalor ka jingkieng Damsite.

Kane ka hukum jong ka Tnad Bording kala mih tang shisngi hadien ka jingkem ki Pulit ia u Bless Dkhar, President ka HNYF, East Khasi Hills, uba lum pisa haduh T. 1500 kawei ka trok kit mar ba kit palat pud, ba un pyllait ba kin iaid na jingkieng Damsite, Umiam.

Kane ka hukum kala mih na ka Under Secretary ka Tnad Power Kong Josephine Nongbet, kaba la phah sha ka Deputy Commissioner ka East Khasi Hills Kong RM Kurbah ba kan pyntreikam.

Kane ka Heh Ophsiar ka Tnad Power, kala pyntip ba ka kaiphod halor ka Safety Audit jong kane ka Jingkieng pyllait um ka Umiam bala ioh na ka IIT, Guwahati, la ai jingmut ba ym dei shuh ban shah iaid ia ki kali heh na kane ka jingkieng kat bym pat lah shna bha ia ki girder beam bad ka deck slab.

Ka kaiphod kala buh ruh ia u pud ba ka jingkit ba khia, ka ba lah ban shah iaid na kane ka jingkieng ka dei ban long tang hapoh ka 15 MT.

Namar kata, kala bthah ia ka Deputy Commissioner ba kan pynkylla ia ka Standing Order jong ka Tnad kaba pyrrkhing ia ka jingiaid ki kali kit mar na kane ka jingkieng Damsite da kaba pynhiar noh ia u pud naka 20 MT sha ka 15 MT.

Da ki phew tylli ki trok kit mar kynthup ki trok ba kit marbam mardih, kila shah bat lut mynta hapoh Lad Umroi, Umiam. Ki MVI kila bat lut ia kine ki trok kiba kit ia ki mar ki mata ba palat 15 MT.

Haba phai biang sha ka jingshah kem u Nongialam ka HNYF, ka jingkylli ka mih mynta ba kumno tang une uwei u Nongialam Sengbhalang u lah ban pyllait trok kat kaba u mon na kane ka jingkieng Damsite hapdeng ki jingpyrrkhing ba bun jong ki hukum ka Iingkashari bad wat ka OPhis ka Deputy Commissioner.

Ki jingsuba kila mih ruh ba ka lah ban don ka jingiatreilang kaba iajan hapdeng une u Nongialam Sengbhalang, ki Pulit bad wat ki MVI jong ka Tnad Transport ban iapyllait ia ki trok kit mar ba palat pud.

Ka Tnad Pulit kaba la register case pyrshah ia une u Nongialam Sengbhalang, hato kala phaikhmat lang ne em sha kane ka jingsuba donkti lang ki Pulit bad ki MVI ha kane ka jingialum pisa beain na ki trok.