Shillong, Risaw 04 : KI Pulit ka Search & Rescue Team ka East Khasi Hills, kila ioh ban sei ia ka metiap jong u samla Wanboklang Kurbah na ka thwei jong ka kshaid Weitdem, kaba don ha khlaw ka shnong Traw.
Ia kane ka met la ioh ban sei hadien 8 kynta hynne ka sngi Balang.
Kumba la iohi na ka video, ka metiap jong une u samla ba 20 snem, kala per ha sla um jong ka thwei kaba khohruh khohram bad ba riat bha. Ka jingjynjar ka jaka kala pynlong ia ki Pulit ka SRT ban shimpor haduh 3:15 baje janmiet kata 8 kynta ban lah sei ia ka met sha lum.
Ia ka metiap jong une u samla la kit noh sha Civil Hospital Shillong ban pyndep ia ka post mortem.
Lah ban kdew ba u Wanboklang Kurbah ba 20 snem bad ka Phibankyntiew Sun ba 18 snem, kila jah nala iing naduh ka 20 tarik Nailur, 2023. La iohi khatduh ia ki ha ka por 5 baje janmiet hala iing ha Marbisu, kaba hap hapoh ka Mawngap Police Station.
Ia ka metiap jong ka Phibankyntiew la lap da ki pulit ka SRT hynnin ka janmiet sngi Ba-ar na kawei ka jaka riat ba kham sharum na ka thwei ba lap ia u Wandonbok.
