Gangtok, Risaw 4: Ka Sikkim kala bthah ia ka North bad East Sikkim ban iahusiar bha namar ka jingima ka rukom poi um ba kynsan kynsan ha ka Wah Teesta.
Ki bor district ka North bad East Sikkim kila shimkhia mardor ia kane ka jingbthah bad pynthikna b aka wah Teesta kala poi ha u dak ka jingma namar ka jingheh ka umsaw kaba shu wan poi kynsan kynsan.
U Sonam Detchu, Superintendent of Police ka Mangan District, ula pynthikna ia kane ka jingima ka rukom poi umsaw bad pyntip ba la bthah ia baroh ki Police Station kiba don ha ka jaka them ba kin peitngor bha. U pyntip ba la dep bthah ruh ia baroh ki briew ba sah harud ka Wah Teesta ba kin iakynriah noh sha ki jaka lum ba kin shngain.
Une u Heh Pulit ula pynthikna ruh ia ka jingjah rngai haduh 23 ngut ki shipai na Bardang.
Kat kum ka khubor ki shipai, la iathuh ba kane ka jingwan poi umsaw kynsan kynsan jong ka wah Teesta ka dei namar ka jingther jong u lapbah lapsan sha ki bynta ba Shatei ka Sikkim kaba lam sha ka jinghap pyllait um na ka dam Chungthang.
La iathuh ruh b aka sor Chungthang ha North Sikkim kala dkut mynta na Sikkim hadien ka jingshah rong noh ka jingkieng kaba pyniasoh ia ka Mangan bad Chungthang.
Ki bor Sorkar kila peitthuh bha ia ka jinglong jingman bad kila pynkhreh lypa ia ki kynhun ai jingiarap nalor ki marbam mardih ban iarap ia ki lanot. La kyntu ruh ia ki nongshongshnong ba kin kohnguh ia ka jingbthah ba kin mih noh nala iing bad leit shong ha ki jaka ba long lum khnang ba kin buh ialade ha ka jingshngain.
