Sikkim, Risaw 4: Arphew lain gut ki shipai ka Ri kila jah rngai na ka jingpoi umsaw kynsan kynsan jong ka Wah Teesta kaba dei na ka daw ka jingther jong u lapbah lapsan ha North Sikkim.
U PRO Defence na Guwahati ula ong “Namar ka jingther u lapbah lapsan ha North Sikkim, ka jingshlei um kaba shyrkhei kala jia ha Wah Teesta ha ka thain Lachen. Bun ki jingtei ha kane ka thain kila shah ktah jur bad ka jingwad jingtip mynta ka dang iaid shakhmat ban pynthikna bha”.
Kala ong ruh ba haduh 23 ngut ki shipai kila shu jah rngai bad ka jingwad ia kine ki shipai kala iaid shaid shaid.
Nalor kane, ki don ruh bun ki kali kiba la shah rong bad shah tap lup ha ka umsaw jong kane ka wah ba shlei.
Kat kum ka kyrwoh bala pyllait da ka Army Eastern Command la ong “Ka jingpyllait ia ka um na Chungthang Dam kala lam sha ka jingkiew kynsan 15-20 phut ka um jong ka wah kaba tuid sharum. Kane kala ktah ia bun tylli ki kali ki shipai kiba pynieng ha Bardang kaba don marjan ka Singtam. 23 ngut ki shipai kila jah rngai bad katto katne ki kali kila shah tap lup bad shah rong. Ka jingwad ia kine ki shipai kala iaid shakhmat”.
U Myntri Rangbah ka Jylla Prem Singh Tamang ula leit ban jurip ia kine ki jaka ba shah ktah.
