Shillong, Jylliew 11 : Kawei ka Nongpang kala iakynduh biang bad la ki bahaiing hasem hadien ka jingjah ba palat lai snem. Ha ka sngi Balang, la aiti ia ka sha ki bahaiing hasem ha Halfway Home, Sabahmuswang.
I Kong Ilasiewdor Gashnga, I Nongtrei ka Halfway Home, ila ong “Kam don jingkmen kaba palat ban ia kaba iohi biang iala ka jingiakynduh biang shi bahaiing hadien ka jingduh noh ia la ki baieid bathoin la bun snem. Ka ong kaba kmen shisha lada ia ka briew, shisien ka por la pynman ba kala lah jah bad bala iap, don jingpang khlieh hynrei mynta kila ioh iakynduh biang”.
Ka Halfway Home, kaba don ha Sabahmuswang marjan ka Jowai, kala pyniakynduh biang ia artylli ki Longiing bad la ki baieid bathoin kiba don ia ka jingpang khlieh bad jah plat ia ka lai snem. Tang ha ka shibnai, ki nongtrei ka Halfway Home kila lah ban pyniakynduh biang ia arngut ki nongpang bad la ki bahaiing hasem.
Ha ka 17 tarik Jymmang, ka Halfway Home kala pyniakynduh biang ia ka Jiratan Bibi ban a Kowarpur, Kamrup District bad la ki bahiing ha ka jingiadonlang u Addl Deputy Commissioner ka West Jaintia Hills
Mynta pat sah ia ka Glorina/Martina Shadap/Kholar la pyniakynduh biang bad la ki bahaiing ha ka jingidon ryngkat i R Passah District Social Welare Organisation (DSWO), Rolinson Teron bad khamtam eh ki bahaiing ka Glorina/Martina Shadap/Khowar.
Ka Halfway Home ka dei ka jaka sah ia ki briew ba don jingpang khlieh kiba dep sumar ha MIMHANS bad ki bym donkam shuh ban sah ha kane ka jaka sumar. Ka Sorkar ka pynkynriah ia kine ki nongpang sha Halfway Home ba kin nang koit nang khlain bad ban khmih ha kaban pyniakynduh pat badla ki bahaiing hasem. Ia kane ka Halfway Home ha Sabahmuswang la pyniaid da ka Society for Urban and Rural Empowerment (SURE).
