Shillong, Risaw 22 : U Myntri ka Sorkar pdeng ba khmih ia ka Ministry of Law & Justice Kiren Rijiju hynne ka sngi saitjain ula ong ba ka Meghalaya ka donkam ban ioh bun ki MLA ka BJP ban lah tynruh bha ia ki ishu kiba ktah ia ki paid nongshongshnong ka Jylla.
Ula jubab ia kane halor ka jingkylli halor ka jingpynslem jong ka Sorkar Pdeng ban pyntreikam ia ka Inner Line Permit (ILP) hapoh ka Jylla.
Haba kyntait ban kynthoh eiei ia kane ka kam namar ka donkam ia ka jingiatai kaba bniah bad ruh ka jingiasyllok, u Rijiju ula ong “Ka Meghalaya ka dei kawei na ki Jylla kiba kiewsted bha bad ka Sorkar NDA ka don ia ka bynta kaba khraw ha ka synshar khadar lem kumta ka jingduh jingmyntoi kan long ia u paidbah”.
Haba pynpaw ba ki paidbah ka Jylla Meghalaya kila jied ia ka sorkar MDA ba ialam da ka National People’s Party (NPP) kaba la treikam bha, u Myntri ula ong pat ba u kyrmen ba ka BJP kan don kham bun bynta ka bynta ha ka Sorkar.
“Ka Meghalaya ka dei ban ioh bun ki MLA n a ka BJP. Ka sorkar ba mynta ha Meghalaya kala treikam bha hynrei ia kaba kham bha shuh shuh lah ban ai shuh shuh lada ka BJP ka kham don bun bynta ha ka Sorkar” ong u Rijiju.
