Shillong, Nailur 22 : Ka Sorkar Pdeng kan rah hapoh ka Dorbar Tlang jong ka ïing dorbar thawaiñ ka ri, ia ka jingthmu ban rah ia ka 125th Constitutional Amendment kaban kynthup iaka jingpynkylla noh ia ki kyndon jong ka Sixth Schedule jong ka riti synshar ka ri.
Ia katei la iathuh hynne ka sngi, da u Chief Convener jong ki Autonomous District Council ha ka thaiñ shatei lam mihngi bad u Chief Executive Member (CEM) ka Khasi Hills Autonomous District Council (KHADC) u Bah Pyniaid Sing Syiem, hadien ka jingwan iakynduh ia u AK Mishra uba long u Adviser jong ka Ministry of Home Affairs, Government of India, NE Region hapoh Nongbah Delhi.
“Ngi la lah ban iakynduh ia u AK Mishra u nongaibuit jong ka Ministry of Home Affairs uba peit ia ka thain shatei lam mihngi jong ka ri bad ha ka jingiakynduh ha ka sngi saitjaiñ, ngi la ioh ban iathir iatai bha ha kaba iadei bad ka jingdawa ka jong ngi lyngba ka jingtyrwa kaba ngi la phah da ka dorkhas ha ka 25 tarik u Naitung ha u Myntri Kam Pohiing ka ri u Amit Shah ha nongbah Delhi. Ngi lah ioh ban iatai bha bad u Adviser bad ula sngewthuh bha ia kaei ka jingthmu ka jong ngi ha kaba iadei bad ka jingthmu ban pynkylla ia ka 125th Constitutional Amendment” la ong u Bah Pyniaid.
“Hadien ka jingiakynduh, ngi sngewthuh shai ba ka sorkar India kan rah ia ka 125th Constitutional Amendment shapoh iing dorbar kaban kynthup ruh iaka jingpynkylla ia ki kyndon jong ka Sixth Schedule jong ka riti synshar ka ri ha u bnai Nohprah” la ong u Bah Pyniaid.
U Bah Pyniaid ula ai khublei kyrpang ia ka Ministry of Home Affairs kaba la sngap ia ki jingai jingmut jong baroh 10 tylli ki District Council bad ha kane ka taiew, u AK Mishra ula iakynduh la ka jong ia ki nongmihkhmat na ka Tripura, Bodo bad ia ka KHADC hynin ka sngi saitjain bad u khmih lynti ba kane ka jingiakynduh kan long kaba seisoh.
“Ngi lah kren shai ba ngin lah ban iapein bad ka nongrim kaba ngi la tyrwa bad ia ka jinglong jingman kaba kyr[pang ka jong ngi, ki riti ki dustur tynrai bad ki jingelh tynrai kin neh kumba ju long naduh ka synshar khaddar haduh kiba bun ki bynta ha kaba iadei bad katei ka jingpynkylla. Ngi kwah ba ka jingpynkylla kam dei pat ban pynduh noh ia ka jingthmu jong ka jingling kyrpang ka jong ngi kum ka jaidbynriew bad u Adviser ula pyntip ba ka liang ka sorkar pdeng kan ialeh ban wanrah ia kata ka jingkylla kaba long kyrpang ha kiba bun ki kolshor bad ki riewlum ha ka thain shatei lammihngi jong ka ri khamtam kiba don hapoh jong ka Sixth Schedule” la pynkut u CEM ka KHADC.
