Nongpoh, Nailur 22: Ka National People’s Party Jirang Block Committee ryngkat bad u MLA ka Jirang Constituency u Bah Sosthenes Sohtun, kila pynkup burom ia ki 74 ngut ki samla pule ha ka jingialang kaba la pynlong ha ka CTI, 12 Mer.
Ha kane ka sngi pynkup burom, la iadonlang u Bah Victor Rani, MDC ka Jirang Konstituensi, u Deputy Commissioner ka Ri Bhoi District u Abhilash Baranwal, ki Principal, Headmaster bad Headmistress na kylleng ki skul lem bad ki samla pule kiba la shah pynkup burom.
Napdeng kiba shah pynkup burom, la ithuh kyrpang ruh ia ka jinglah ban wan shakhmat jong u Khrisna Koirala, na ka Little Star Higher Secondary School uba la ioh haduh 91.16%, ka Ruphimon Makri kaba pule Klas IX ha Mt. Zion Academy kaba la shah jied ban mihkhmat ia ka Ri Bhoi District ha ka Prepana Programme kaba la long ha Gujarat bad ia u Johny Nongrum uba la khur ia ka takma ksiar ha ka jingiakhun ia ka Muaythai World Championship kaba la long ha Indonesia.
Haba kren ha kane ka sngi, u MLA bad DC kila pynpaw ia ka jingkmen ban sakhi bad ka thaiñ Jirang Block kala nang kiew ha ka pule ka puthi na ka jingnang mih ki samla pule kiba pass bha ha kine ki snem ba la leit noh bad kila kitbok kitrwiang ruh ia ki samla pule ba kin nang iai trei shitom ban pynphyrnai ia ka lawei jongki.
“Ka jingnang jingstad ka long kaba kordor tam bad ka dei ka spah bah ka bym lah ban tuh noh da mano re mano, hynrei ka dei hi ka jingminot bad ka rai kaba skhem jong u ne ka samla pule ba kin angnud ban leh bha ha ki eksam bapher bapher ban poi sha ka thong kaba ki thmu”, ong u DC bad ka bynrap, ba ka Eksam SSLC ka dei ka eksam kaba nyngkong eh bad kaba kham kongsan na bynta ki samla pule bad kidei ban don ka thong ban poi ne jop sha ki eksam kiba kham heh ha ka rta ka jong ki.
