Tura, Naitung 13 : Ka West Garo Hills District Swimming Association kan pynlong ia ka swimming trial na ka bynta ka 39th National Games ban wan ha Tura Swimming Pool Complex, Rongkhon, ha ka 19 bad 26 tarik Naitung.
Kane ka trial ka plie lad ia baroh ki nongjngi kynthei bad shynrang kiba kwah iashimbynta na kylleng ki 5 tylli ki District ka Ri-lum Garo-West, South West, South, North bad East Garo Hills- kiba la kynjoh palat 14 snem ka rta.
Ka Association kala pynbna ruh ba kan nym ai satia ia ka bai leit bai wan bad ki jinglut ba man ka sngi sha ki nongwan iashimbynta. Hynrei, ki nongjngi kiba shah jied kin sa ioh ia ki jinghikai pyntbut ha Rongkhon Swimming Complex shuwa ban phah ia ki sha Shillong na ka bynta ka jingjied ia kiban ioh iashimbynta.
Haba iakren bad u nongai khubor, u Sengrak D Marak ula ong “Ngi don bun ki wah bad ki pung ha ri-lum Garo. Nga ngeit ba lada ai ia ka rynsan kaba dei, ki samla jong ngi, kin lah ban lehbha ha ka kyrdan ialehkai ha Jylla bad hapoh ka Ri. Kaba kongsan ka long ban ithuh ia ka sap bad ban ai ia ki jinghikai kiba dei sha ki”.
Ula bynrap “Ka Sorkar Jylla kala shimkhia bha ban kyntiew ia ki kam ialehkai. Kane ka dei ka lad kaba khraw ia ki samla. Kito kiba lehbha bad jop takma kin iohnong bha na kane”.
Ka Tura Rongkhon Swimming Complex ka dei kaba dang shu dep maramit hashuwa ka Meghalaya Games 2024. Naduh katei ka por, ka WGHDSA kala shimti ban khmih ia kane ka jaka jngi bad ai jinghikai ia ki nongjngi ba dang khynnah.
