Shillong, Risaw 08: Ka kynhun jong ka SDRF, NIM, Airforce, HAWS, Indian Army, ITBP bad kiwei pat hynne ka sngi kila ioh ban sei iaka met jong u samla Tiklu Jyrwa bad kiwei pat kiba la shah tap ha u lumthah Draupadi Ka Danda II ha ka 4 tarik mynta u bnai.
Ha ka 4 tarik u Risaw kila don 41 ngut ki nongkiew lum ryngkat bad ki nongai jinghikai kila leit ban kiew ia u lumthah Draupadi Ka Danda II uba don ha Jharkhand hynrei une u lumthah ula twa kynsan bad na kitei ki 41 ngut 29 ngut kila shah tap ha utei u lumthah.
U samla Tiklu Jyrwa uba shong ba sah ha Upper Lumparing Shillong bad kiwei pat ki nongkiew lum kila jah rngai naka jingtwa jong u Lumthah ia kaba ym shim la don ban poi pyrkhat ba ka apot sepsngi kan leit jia ha kitei baroh.
U bah Wallambok Lyngdoh Marshillong uba long u General Secretary ka Meghalaya Sport Climbing and Mountaineering Association (MeSCMA) ula pyntip ba u samla Tiklu Jyrwa u dei u dkhot jongka MeSCMA bad ula leit ryngkat bad ki 40 ngut kiwei pat ki nongkiew lum ban iashimbynta haka Advance Mountaneering Course kynthup ia ki nongai jinghikai jongka Nehru Institute of Mountaineering (NIM) Uttarkashi.
Kine baroh kila leit kiew ia une u lumthah haka por 4 baje mynstep jong ka 4 tarik bad ha ka por ba ki wanphai ha ka por 8:45 mynstep, u lumthah ula twa kynsan bad ula ioh tap ia ki 29 ngut ki nongkiew lum kiba kynthup ia ki 27 ngut ki nongkiew lum bad 2 ngut ki nonghikai.
Ka kynhun SDRF, NIM, Airforce, HAWS, Indian Army, ITBP bad kiwei pat ki kynhun, kila leit wad ia kine kiba la jah ha utei u lumthah bad ha ka 8 tarik u Risaw kila ioh ban sei ia ka met jong ki 7 ngut ki nongkiew lumthah kiba kynthup ia u samla Tiklu Jyrwa.
Haduh mynta ka sngi kila ioh ban sei iaka met jong ki 26 ngut ki nongkiew lum thah bad ki nongai jinghikai bad mynta ki dang wad ban lap sa ia ki 3 ngut kiba dang shah tap ha u lumthah.
Ia ka met jong u Samla Tiklu Jyrwa bad ka Deepshikha Hazarika kaba na Assam kin wanpoi lashai ka sngi haka por 4 baje nohphai sngi ha Guwahati Airport.
