Nongpoh, Jymmang 18: Ki runar ki bym lah ban tip ki dei kiei, kila prung tuh biang ha ka sien kaba saw hapoh ka Iingmane ka Balang Presbyterian, Umdihar bad kila rong tuh bad pynjot pynjulor ia ki jingdon jingem kiba don ha kane ka Iingmane.
Kat kum ka khubor ba ioh na ki nongsharai ka Balang, kane ka jingjia kala jia ha ka miet shiteng synnia jong ka 17 tarik Jymmang.
La pyntip ba ki runar kila prong jubor na kawei ka jingkhang it da kaba shu lied da ki kynja nar.
La iathuh ba kine ki runar kila leh dusmon ia ki tiar kyntang jong ka Iingmane bad rong tuh ia ka pisa ba lum baikynshew, ki khiew syntiew bad katto katne ki tiar Vlba pyndonkam na ka bynta ka jingiaseng kyrpang.
Ha kren sha ki Nongthoh Khubor u Bah R B Shadap u wei na ki Rangbah Balang ka Jingiaseng Presbyterian Umdihar, u la iathuh ba kum ka Jingiaseng hi baroh kynthup naduh ki Rangbah Balang, Ki Tymmen Basan, ka Jingiaseng Kynthei bad CE Union, ki dap da ka jingsngew sih kthang halor kane ka jingjia shah rong tuh bad ka jingshah leh dusmon ki tiar ki tar bad ka iing mane hi ba la leh da ki runar ki bym lah ban ithuh satia.
U la iathuh ruh, ba kum kane ka jingjia hapoh kane ka iingmane kam dei shuh ka sien ba nyngkong hynrei la iai jia na kawei ka por sha kawei ha ki snem ba la leit noh.
U iathuh ba ka Balang hi ka shu sngap ia kine baroh hynrei dei ha kane ka kynti ba ki dkhot ka balang kim lah shuh ban shu sngap bad kumta la rai ban aiti sha ka Dorbar Shnong ban leh ia kaba donkam ban ai sha ki bor ka ain da kaba ujor ejehar halor kane ka jingjia.
U Bah Shadap u la iathuh ruh, ba ki runar ki la prong jubor ha ki por shiteng miet bad ki la rong noh ia ka pisa ba la lum kynshew ha ki jingiaseng, ki khiew syntiew ba rem dor, ki la pynjot ruh ia ki tiar tem jong ka CE Union bad ruh ban rah ia ki tiar kyntang ba ju pyndonkam ha ki jingiaseng kyrpang.
Na ka liang ka Balang hi ka shaniah mynta ha ka jingstad jong ka Dorbar Shnong Umdihar ban leh ia kaba donkam.
