Nongstoiñ, Risaw 2: Ki jaitbynriew Nepali wat la kim dei ki nongshong shnong ba pura jong ka ri India, hynrei ym lah ban len їa ka jingshisha ba ha man la kawei pa kawei ka jylla hapoh ka ri India, ki Nepali ki don tangba kim dei pat kiba bun paid kum kiwei ki jaitbynriew.
Haba phai ha ki jylla kiba don shaphang shatei lam mihngi jong ka ri India, ka jingdon ki nongshongshnong kala kiew sted bha katba nang iaid ki snem khamtam ha Meghalaya.
Ha West Khasi Hills ha shuwa jong u snem 1982-83 hapoh u pud u sam jong ka hima Nongstoiñ, Myrїaw, Rambrai, Nonglang Sirdarship bad Jyrngam Sirdarship, ki lum bad ki khlaw ki btap ki dap da ki khuti jong ki Nepali.
Ka Shlem kala ioh ban iakren bad uwei u Tynmen Nepali uba dei u nongshongshnong na ki Nepali ba la tymmen tam ha Langpih, uba la iathuh khana kumno ki Nepali kila wan poi sah ha u pud u sam ka West Khasi Hills.
U bah Maila Chetri u ba la 98 snem ka rta bad u ba shong ba sah mynta bad u para khatduh ha Langpih, u la їathuh їa ka jinglong jingman ha ka por ba u dang khynnah haba pyntip ba nyngkong eh ula poi shong shnong ha shnong Nonglang ha kawei ka jaka kaba dei ka per jong ka (L) kong Hiam Lyngdoh bad ha katei ka thaiñ ki don kumba saw khuti ki Nepali kiba ri muid.
U la їathuh ruh ba shaphang shathie ha ka them wah Tyrsung ki don kumba shiphew khuti, hynrei kiba bun tam ki khuti jong ki Nepali ha kata ka por ki dei ha ka thaiñ Patharkhnang, Proin, Tynhiang, Porla bad kiwei kiwei ki jaka.
U la їathuh ruh ba dei ha ka por ba ki briew na Hima Maharam ki la wan buhai shnong ha Nonglang kata ha u snem 1951-52, ha kaba ki la don kumba saw ne san їing ki la beh krad їa ki na katei ka jaka bad ki la leit shong noh ha Kyndongei. Nalor kata u la їathuh ruh ba ki la shong ha Kyndongei palat khatsan snem shuwa ba kin krih sha kiwei pat ki jaka.
Hadien kata u pyntip ban a Kyndongei ki la iaphet noh sha Kyndangїawbah hajan ka shnong Ktiehthawїar kaba la shong shnong nyngkong eh da u (L) bah Phang, u (L) bah Raimon, ka (L) kong Jro, bad kiwei kiwei. Ha Kyndangїawbah ruh ki la shong kumba shiphew snem. Hadien kata ki la phet noh sha ki thaiñ Tynghor bad ki la shong ha Domtli, Porkadoh, Umthlong bad hadien katto katne snem ki la wan shong noh ha Mawsikar.
U la їathuh ba na Mawsikar pat ki la hiar noh sha Langpih bad ha ka por ba ki dang sdang wan shong khuti ha Langpih, ki don tang kumba saw ne san khuti ki Nepali bad ha ki por tlang ki leit buh khuti ha Mawdiangsnam, Umpha, Warla, Sahmiew, Umbah bad kiwei kiwei ki jaka.
U Maila Chettri u iathuh ba katba dang iaid ki snem, ki Jaidbynriew Nepali kila nang kha roi ha ka thain nalor ka jingwan ki riew thymmai, kaba la pynlong ia ki ban bun paid kumne kumba ki long mynta
