Shillong, Risaw 31 : U Nongialam ka NPP bad Myntri Sorkar Rakkam A Sangma ha ka sngi Palei, ula pynpaw ia ka jingsngew skhem ba ka party jong u, kan ioh ia ka jingjop ha ka elekshon shiteng samoi ka Gambegre da kaba tam kput haba kem ruh ba ka rai jong ka BJP ban iakhun ia ka elekshon kan dei kaba ktah jur bha ia ka Congress kaba don ha Liang Pyrshah.
“Ka NPP kan ioh ia ka jingjop da ka jingkhein ba thaw record namar ka jingkyrshan ki paidbah kala nang kiew nang kiew. Kila sngewthuh namar ha u 2023, ka Gambegre ka don ha u nombor ba bakla namar kim tip mano ban thaw ia ka Sorkar bad kumta kila vote ia ka congress bad u Saleng A Sangma ula poi shong sha Liang Pyrshah” ong u Rakkam.
Ka kurim u Conrad K Sangma Myntri Rangbah ka Jylla-ka Dr Mehtab Chandee A Sangma ka dei ka kyrteng jong ka NPP bad kan iakhun pyrshah ia 5 ngut ki kyrtong kiba kynthup ia u Jingjang M Marak jong ka INC, ka Sadhiarani Sangma jong ka TMC, u Bernard N Marak jong ka BJP bad arngut ki kyrtong shimet-u Sengkrabirth M Marak bad Jerry A Sangma.
Haba pynpaw ba ka Gambegre kala ioh ia ka kabu ksiar, une u MLA ka Rongara-Siju ula ong “Ki lah ban jied ia u/ka MLA, ba iadonlang ha ka Sorkar. Ka dei ka dak kaba bha. Nga la thikna shispah na ka shispah b aka Dr Chandee kan ioh ia ka jingjop” ong u Rakkam.
Ula ong ba ki paidbah ka Gambegre kin vote ia ka NPP na ka bynta ka roi ka par jong ka Constituency. “Ki paidbah ka Gambegre ki donkam ia ka roi ka par bad donkam ia ka jingkyrshan jong ka Sorkar. Ki donkam ia u/ka nongalam, kiba lah ban iakren bad ba iajan bad ka Sorkar. Nga tip ba ki paidbah ka Gambegre ki dei kiba stad ban jied ia la ki nongialam”.
Une u Nongialam ka NPP ula ong ba ka lyer jong ka Congress kam don shuh mynta ha Ri-lum Garo bad kan nym don jing ktah eiei ruh em ha ka elekshon shiteng samoi ha Gambegre.
U Rakkam ula ong ba ka rai jong ka BJP ban mih iakhun ha ka elekshon kan dei kaba ktah jur bha ia ka congress namar kine ki ar party ki dei kiba iatreilang ha ka elekshon MP ba dang shu dep.
“Kila ia vote lang ha ka elekshon MP ka Tura. Ka BJP bad ka Congress kila ia vote lang. Ia kane la pynpaw pyrthei hi da u MDC ka BJP na Tura, u ba dei u kyrtong ban iakhun na ka BJP ha kane ka elekshon shiteng samoi. Kane kam dei kaba nga kren ma nga hynrei dei u Bernard dalade uba la iathuh ba ka BJP kala iatreulang bad ka Congress ban pynjop ia u Saleng bad ba kila iashong jingialang ha ka iingsah jong u”. ula ong.
