Shillong, Risaw 31 : U Myntri ka Ministry of Road Transport & Highway (MoRTH) Nitin Gadkari, hynne ka sngi Ba-ar, ula pyntip ba ka Ministry ka lah ban pynsangeh noh ia ki project ha Meghalaya bad Nagaland lada kim lah pynbeit kloi ia ki kam iadie iathied jaka jong ki project.
U Gadkari ula pynpaw ia kane haba iakren bad ki nongthoh khubor ha Guwahati haba pyntip ba ka Ministry kala dei bei pisa ba jan kot ia ka T. 3 lak klur ha kine ki 10 snem bala leit noh, ban shna ia ki surok National Highway hapoh ka thain Shatei Lam Mihngi ka Ri.
“Ki project ba kot haduh T. 2,89.425 klur la dep ai sha ka thain Shatei Lam Mihngi ha kine ki 10 snem bala leit noh. Kine ki kynthup ia ki project ban dang wan, ki project kiba la pyntrei bad ki project bala dep” ong u Gadkari.
Ula ong ba kane ka song pisa ka dei ban pynjrong shuh shuh ia ka jingjngai jong ka National Highway da 45% hapoh ka thain.
Ula pyntip ba ka jingjrong jong ka National Highway ha ka thain kala kiew n aka 10,800 Km ha u snem 2014 sha ka 15,749 Km mynta.
Haba kylli, u Gadkari ula pynpaw ba ki bor Sorkar ha ki katto katne ki Jylla jong ka thain kum ka Meghalaya bad Nagaland, kila mad ia ki jingeh ha ka jingthied jaka ban ioh pyntrei ia ki project. Ula ong “Lada kine ki Jylla kim lah pynbeit noh kloi ia kane ka kam, ngi lah ban pynkut noh ia ki project”.
U Gadkari ula pynbna ruh ia ka song pisa ba T. 8000 klur na ka bynta ki artylli ki skhim ia ka Assam.
