G20 Conclave : Ki paid Meghalaya ki don jingiadei ba iajan bha bad ka mariang, ong u CM

Shillong, July 6: U Myntri Rangbah ka jylla u Conrad Sangma ha ka sngi Palei, ula ai jingkren ha ka G20 Conclave halor ka phang “Nature Solves in Shillong”.

U Conrad ula ong ba kane ka jingialang kan wanrah ia ka buit pyrkhat jong ki riewshemphang ba kin wad ia ki lad ki lynti jong ka rukom treikam ka ban iai neh skhem na ka bynta ka lawei ban wan.

“Ki paidbah ka Meghalaya kila don lypa iaka jingiadei kaba jan bha bad ka mariang naduh ki por kiba mynshwa. Ngi long kiba la kyrkhu lyngba ka jingdon kyrhai ka mariang ia kaba longshwa manshwa kila iada kyrpang naduh ki por hyndai hynthai” ong u Myntri Rangbah..

“Ka jingpynneh iaka kolshor bad ka rukom im kala long kaba iaid ryngkat bad ka mei mariang. Ngi long kiba sngewrit lyngba ka jingstad bad ka jinghikai kaba ngi la ioh na ka mei mariang bad ngi da sngewsarong bha ia kane” ong u Conrad Sangma.

“Ka imlang sahlang ha Meghalaya ka lah ban ialam shakhmat ha kaban pynneh pynsah iaka mariang katkum ka rukom im na ka bynta ka pyrthei bad ban thaw iaka imlang sahlang ryngkat bad ka ioh ka kot” ula ong.

U Conrad Sangma halor ki Law Kyntang 

Haba batai bniah shaphang ki Law kyntang ha ka jylla, u Myntri Rangbah ula ong ba kine kidei kiba khuid bad kidei shi bynta jong ka jingngeit tynrai kaba dei kaba la laeh naduh ki por hyndai hynthai ban pynneh pynsah iaka mariang katkum ka jingstad bad ka kolshor kaba la iohi lypa da ki menbarim.

Ula ong ba ki don palat 100 tylli ki Law Kyntang ha palat 10,000 hectar ka jaka bad palat 150 tylli ki shnong ki longtrai ia kine ki Khlaw kaba kot haduh 2,500 Hectar ha ka jylla Meghalaya, ia kaba la pynneh pynsah bad shimkhia bha da ka imlang sahlang.

U Conrad ula ong “Ka sorkar jong ngi kala sdang iaka Green Meghalaya, bad kane ka long kaba kham phyla, ha kaba ka imlang sahlang ka ioh pdiang ia ka khusnam na ka bynta ban pynneh pynsah bad ban iada ia ka mairiang. Ngi don ia ka thong ban pynneh 2 lak hectar ka khlaw ha kine ki 5 snem kiban wan lyngba katei ka prokram”.

Ka bha ka miat na ka bynta ki pateng ban wan 

Ha kaba kren na ka bynta ki pateng ban dang wan, u Myntri Rangbah ula ong, “Haba ngi iatai na ka bynta ban pynwandur thymmai na ka bynta ka lawei, ngim dei ban klet ba ngi dei ki nongri nongsumar iaka pyrthei, ia kaba la pynkhamti ia ka kamram ban pynthikna iaka bha ka miat jong ki pateng ban dang wan”.

“Ngi dang ap iaki lad ki lynti ban pynneh pynsah iaka mariang bad kadei ka kamram ka jong ngi ban pdiang ia ki naduh mynsiem” ong u Conrad.

Ula ong “Ka shap ka jong ngi – Pa’Khla (Clouded Leopard) bad Maimai (Hill Myna) ka pyni shai ba ngi long kiba riewspah ha ka jingdon jingem ka mariang bad ki jingim ki bapher bad ngi la pyniaid shakhmat iaka mishon ban pynsngewthuh iaka jingkordor ban pynneh pynsah ia ki mariang bad ia ki mrad ha kylleng ki skul bad ki college kiba don hapoh ka jylla”.