Shillong, Nohprah 11 : Ka kynhun ialehkai ka West Khasi Hills bad ka Eastern West Khasi Hills, kila sdang ia ka jingiakhun phutbol U-18 jong ka Meghalaya Games 2024 da ka jingjop pyrshah ia ki kynhun ialehkai na Ri-lum Garo.
Ka Eastern West Khasi Hills kala iakhun pyrshah ia ka kynhun ka East Garo Hills ha ka jingialehkai kaba ar jong ka lympung bad kane ka kynhun na ka District ba thymmai ka Jylla, kala pynloem ia ka East Garo Hills da 7-0 kol.
Ka jingiakhun hi kala lah shiliang naduh ba riew ka jingput jong ka kylla step bad ha ki 45 minit jong ka jingiakhun, ka Eastern West Khasi Hills kala ioh ban thep haduh 4 kol la nod.
Haba wanphai sha ka kylla miet ruh, ka kynhun ialehkai ka Eastern West Khasi Hills kam shym la ailad satia ia ki rang ialehkai ka East Garo Hill ban tur sha u kol. Ka Eastern West Khasi Hills kala ioh ban thep biang sa 3 kol khlem da ai wat shikol ruh ban pynphai.
Ka West Khasi Hills pat kala iakhun pyrshah ia ka South West Garo Hills bad kala ioh ia ka jingjop da 1 kol la nod, ka kol kaba la thep ha ka kylla step jong ka jingiakhun.
Ka Eastern West Khasi Hills bad ka West Khasi Hills, kila ioh khur ia ki point ba nyngkong eh bad jam sha kawei pat ka kylla jong ka jingiakhun.
