Shillong, Jymmang 10: U Chief Electoral Officer ka Jylla Meghalaya Bah FR Kharkongor, u pyntip ba ka jingpoi thep vote jong ki nongthep vote ka Sohiong Constituency kala kot ia ka 91.87% tad haduh ka por 6 baje janmiet, kaba kham bun ban ia ka elekshon bala dep,kaba kot 90.46 %.
Ka jingiathep vote kala sdang naduh ka por 7 baje mynstep bad la buh ban pynkut ha ka por 4 baje janmiet, hynrei kat haduh ba thoh ia ka khubor, ka jingiathep vote ka dang iaid ha ki katto katne ki polling station.
Haduh 34,783 ngut ki nongthep vote ba kynthup ia 17,096 ngut ki shynrang bad 17687 ngut ki kynthei kin iathep ia ki vote jong ki ha ki 63 tylli ki polling station, ban jied ia u Nongmihkhmat sha ka Iingdorbar Thaw Ain ka Jylla.
U CEO u pyntip ruh ba ki don lai tylli ki Polling Station kiba ka jingpoi jong ki nongthep vote kala tam ia ka 96%. Kine ki dei ka Mawmaram kaba kot 96%, ka Kharangoi kaba kot 96.5% bad ka Nongrikmen kaba kot 96.3%.
U CEO u pyntip ruh ba ka Tnad Excise ka Jylla kala ioh ban kurup ia bun bah ka kyiad hapdeng ki kynta ba dang iaid ka jingiathep vote ha Sohiong. Ia kane ka kyaid Indian Made Foreign Liquor (IMFL) la ioh ban kurup na ka shnong Mawkohtep ha ka por 2 baje janmiet.
U pyntip ba ka kyiad bala ioh kurup ka long haduh 1450.70 liter kiba dei jong ki kompani bapher bapher bad kiba shongdor haduh 4 lak tyngka eiei.
Ia ka elekshon MLA ha Sohiong la pynkynriah shadien hadien ka jingkhlad noh jong u Myntri kam Pohiing barim ka Jylla bad kyrtong ka UDP Bah HDR Lyngdoh ha ka 20 tarik Rymphang. Ka elekshon MLA kala long ha ka 27 tarik Rymphang ha baroh kawei ka Jylla.
Haduh 5 pyrton ki CAPF kila pahara ha kane ka elekshon ha Shillong ban pynthikna ia ka jingiaid beit iaid ryntih. Ka Tnad Election kala pyndonkam ruh ia ki women flying squad ha ka sien ba nyngkong eh nalor ka ka polling station tang jong ki kynthei.
