Shillong, Nohprah 08: Ka People’s Democratic Front (PDF) kan pynbna noh iaki kyrteng jong ki kyrtong ban iakhun iaka ilekshon 2023 hashuwa ka khristmas 2022.
“Ka party kan pynbna noh iaki kyrtong bad kin don kumba 7-8 ngut ki kyrtong ba la thikna ban iakhun iaka ilekshon 2023” la ong u president ka PDF u bah Banteidor Lyngdoh.
U bah Banteidor u la ong ruh ba ka PDF ka don jingthmu ban pyniakhun na 20 tylli ki konstitwensi namar haduh mynta kila don kiba wan ban pan ticket naka Party.
Lah ban kdew ba mynta ka PDF ha ka ilekshon 2018 ka jop 4 ngut ki MLA ba kynthup u bah Banteidor Lyngdoh na Mawkynrew, u bah Gavin Miguel Mylliem na Sohra, u bah Hamletson Dohling na Mylliem bad u Jason Mawlong na Umsning.
U bah Banteidor u la iathuh ba haduh mynta ki 2 ngut ki MLA ba kynthup u bah Jason Mawlong na Umsning konstitwensi kim pat phah ktien shaka party la ki dang neh bad ka PDF ne kin iasoh sha kiwei ki party.
U la iathuh ruh ba ka party kan sa pynbna sa kiwei ki kyrtong ha u bnai Kyllalyngkot 2023.
Nalor kane u bah Banteidor u la ong ba haduh mynta kam pat don kano kano ka jingiateh paralok bad kiwei ki sengsain pyrthei hynrei ia kane yn sa bishar hadien ka ilekshon hynrei naka liang ka party ka kloi ban iatreilang bad kiwei ki sengsain pyrthei riewlum kiba iahap jingmut bad kiba ieng naka bynta ka bha ka miat ki paidbah bad ka jylla baroh kawei.
