Shillong, K’Lyngkot 31: Ka Khliehriat Block Congress Committee (KBCC), ka Youth Congress Committee bad ka Mahila Congress Committee jong ka Khliehriat hynne ka sngi ka la ai por 48 kynta ia ka Meghalaya Pradesh Congress Committee (MPCC) ba kan pyndam noh iaka kyrteng jong ka kong Jhanika Siangshai kum ka kyrtong ban iakhun na ka tiket jong ka Congress ha kane ka ilekshon ban wan.
U secretary ka KBCC u bah Rimistar Dkhar ula ong ba kane ka jingpyrshah iaka kong Jhanika Siangshai ban long ka kyrtong jong ka Congress ha kane ka ilekshon kadei namar ba ka kong kong Jhanika Siangshai kam dei shuh satia ka dkhot jong ka Congress.
“Ka khliehriat Block Congress Committee ka dap da ka jingsngewsih bad sngewdiaw ka mynsiem ban iohi ia ka kyrteng ka kong Jhanika Siangshai kum ka kyrtong ka party na Khliehriat bad kane ka jingleh ka MPCC ka la shu shimrai hi beit khlem pyntip bad ia syllok shuwa…kane ka pyni ia ka jingbymsuit niew bad jingbym burom shuh ia ki nongialam ka Block bad district level da ka MPCC” la ong u bah Rimistar.
U bah Rimistar ula pyntip ba hadien ba la ioh jingtip ba ka MPCC kala pynieng daka kong kong Jhanika Siangshai ka Khliehriat Block Congress Committee, ka Khliehriat Assembly Youth Congress Committee bad ki Mahila Congress Committee, ki circle bad ki unit jong ka party ki la ialum kyrkieh ia ka jingialang bad la shim iaka rai ban kyntait iaka kyrteng jong ka kong kong Jhanika Siangshai ban long ka kyrtong jong ka Congress na Khliehriat konstitwensi.
Ula ong ba kila aipor 48 kynta ia ka MPCC ban weng ia ka kyrteng jong ka kong kong Jhanika Siangshai kum ka kyrtong bad lada ka MPCC kam sngap ia kane ka rai jong ka block, kam banse ban shim da kawei ka rai kaba tyngeh.
Shuh shuh ula ong ba ha kano ka nongrim ka MPCC ka ai tiket ia ka kong Jhansi ka briew kaba la mih na ka party naduh u snem 2022.
