Nongstoiñ, K’lyngkot 31: Ka BJP Nongstoiñ ka la phah jingtyrwa kumba phra tylli ki mat jingdawa ba ka BJP-Meghalaya kan mynjur ban buh lang ha ka manifesto jong ka party ba kynthup ia ka ILP, ka kam tih dewiong, ka jingiapynbeit pud bad kiwei kiwei.
Ka BJP-Nongstoiñ Mandal lyngba u Working President Bah D.Jyndiang, ka la dep ban phah ia kane ka jingtyrwa sha u Bah Ernest Mawrie President jong ka BJP Meghalaya.
Ka BJP-Nongstoin ka pyntip ba kine ki mat ki kynthup ïa ka ILP, ka jingpynrung ia ka ktien Khasi ha ka khyrnit ba phra, ka jingiapynbeit ia u pud u sam bad ka Assam bad ruh bad ka Bangladesh, ka jingeh ban tih dewiong na ka daw ka jingkhang ka NGT, ka jingdawa ban pynrung ïa ka rukom pule dangle katkum ka jingstad Digital, ka jingpynbha ïa ka kam rep bad kam ri jingri, ka kam jngoh kai pyrthei, ka kam pynmih bording bad ha ka liang ka jingpynbha ïa ka koit ka khiah.
La ong ruh ba kine ki phra tylli ki mat ki dei kiba ka BJP Nongstoiñ, ka angnud ba ka BJP Meghalaya bad kumjuh ruh na ka liang ka BJP central body, kin mynjur lem hashwa ban ïaid shaphrang ha kane ka elekshon.
Na ka liang u Bah D.Jyndiang u la pynpaw ka jingkyrmen ba ka State bad Central level jong ka party, kin mynjur ïa kane ka jingtyrwa na ka liang ka Nongstoiñ Mandal. La ong ba kine ki dei kiba kongsan eh kiba kum ka jaidbynriew ka donkam palat katkum ka jingïaid jong ka por.
