Shillong, Nohprah 09 : U President ka BJP Meghalaya u Bah Ernest Mawrie hynne ka sngi thohdieng, ula pyntip ba ka BJP kan pynieng iaki kyrtong ha baroh 60 tylli ki Constituency ban aireng iaka Elekshon MLA 2023 ha ka jylla.
“Ka seng BJP kan pynieng kyrtong ha baroh 60 tylli ki Constituency jong ka Meghalaya bad ngi khmih lynti ba ki paidbah kin pynjop bun ia ki kyrtong ban ailad noh iaka BJP ban ialam iaka sorkar kumba ki paidbah kila dep ban ailad ia kiwei kiwei ki seng sain pyrthei ban ialam iaki sorkar kiba la dep” ong u Bah Ernest.
Ula ong, ka BJP Meghalaya kala dep ban kyrpad iaki nongialam kiba hakhmat eh jongka party ban pynbna noh kham kloi iaka kyrteng jong ki kyrtong kiban aireng iaka elekshon MLA 2023.
U Bah Mawrie ula ong ruh ba ka seng ka dang ap ba ka Election Commission of India ba kan pynbna noh iaka tarik ban pynlong iaka elekshon ha Meghalaya khnang ba ka seng kan ioh ban khot aplikeshon ia ki kyrtong kiba kwah ban iakhun iaka elekshon khamtam haba ki don bun ki kyrtong kiba la pynpaw ba ki kwah ban iakhun iaka elekshon naka seng BJP.
U Bah Mawrie ula ai khublei ruh iaki nongialam jong ka BJP halor ka jingjop iaka elekshon ha Gujarat kaba pyni ba kipaidbah ki dang ieid iaka BJP bad ula ong ba ka elekshon ha Himachal Pradesh ka BJP kam shym la lah ban ialam ia kasorkar nama rba ki paidbah kumba ki ju leh naduh ki snem kiba la dep ki ailad tang 5 snem ia kano kano ka seng sainpyrthei.
“Ha ki 8 snem kiba la leit ryngkat bad u Myntri Rangbahduh ka ri u Narendra Modi la tyrwa bun jait ki skhim naka bynta ki paidbha ka jylla Meghalaya hynrei ka sorkar kam shim la pyrwa eiei ia kitei ki jingtyrwa, kumta ka long kaba kongsan iaki paidbah ka jylla ba kin jied noh iaka BJP khnang ba ki skhim kam pynroi kin lah ban poi sha ki paidbah baroh” ong u Bah Mawrie.
