Shillong, Nohprah 09: U MLA ka North Shillong Constituency bah Adelbert Nongrum hynne ka sngi thohdieng, u la aiti da ki kali sha ki phra tylli ki kynhun jong ka konstitwensi ba kin ai ka jingshakri ia ka imlang sahlang ha ka Constituency bad shabar ruh kumjuh.
Kine ki kali ki kynthup ki kali kit nongpang bad ki kali ban pyndonkam na bynta ban shakri ia ki nongshong shnong ka North Shillong bad ia ka jylla hi baroh kawei.
Ia bad kine ki 8 tylli ki kali la mang lyngba ka MLA Scheme bad ki kynthup ia ki kali kit nongpang sha ka KSU Jaiaw Circle, FKJGP Jaiaw Circle, HYC Mawkhar Circle, sha ka 17 North Shillong Constituency Implementation Committee, ki kali na bynta ki jingdonkam ka Church of God Educational Trust, La I Sap, Jaiaw Eh Rngiew Transport Society.
Haba kren ha kane ka jingialang u bah Adelbert u la ong ba ka jingaiti jong u sha kine ki kynhun ia ka kali kam dei namar ba la dei ka aiom ilekshon hynrei ka dei ka jingai ia ka bhah ba dei hok jong u paidbah bala mang da ka sorkar jylla.
U bah Adelbert u la ong ba ka jingaiti ia kine ki kali kadei naka bynta ka pateng ban wan khnang ba kin lah ban shakri hok ia u paidbah bad u la ong ruh ba kum u MLA ka thain u la pyrshang wanrah da ki aiñ bad ki Policy kiba donkam na bynta u paidbah ka jylla bad ki pateng ban wan.
“Ki kali kim dei ban kut ka jingshakri tang na bynta kiba shong ba sah ha North Shillong hynrei ha baroh kawei ka jylla haba ki don kino kino ki khep ba ki donkam jingiarap na ki” la ong u bah Adelbert.
