Shillong, Nohprah 10 : U MLA ka Congress ba shah sospon ba mihkhmat ia ka West Shillong Bah Mohendro Eapsang, hynne ka sngi palei ula pynthikna ba un sa pyniasoh noh sha ka National People’s Party (NPP) ha kine ki khyndiat taiew ban wan.
“Ia mynta hi nga dang dei u MLA ka Congress hynrei ngan ym mih iakhun shuh na ka Congress namar ba nga don hapdeng ka jingshah sospon bad ha kine ki 10 snem ban wan, ngan sa iehnohkam naka Party bad kum u MLA ruh ban leit pyniasoh noh sha ka party thymmai bad nga thikna ba ngan iasoh bad ka NPP” ong u Bah Rapsang.
Halor ka jingiehnohkam na ka Congress, une u MLA ula pynpaw ba u sngewsih halor ka rukom leh jong ka party ia u bad ia ki saw ngut kiwei pat ki MLA ba shah sospon.
“Ka roi ka par jong ki Nongshongshnong bad ki Shnong ki thaw kan dei ki artylli ki mat ba hakhmat eh jong u ban mih iakhun ha kane ka elekshon MLA 2023” ula ong.
Haba iaroh ia ka Sorkar MDA ba ialam da ka NPP, u Bah Rapsang ula ong ba hapoh ka jingialam jong u Myntri Rangbah Conrad K Sangma, shibun ki prokram jong ki samla la pyntreikam ha kane ka samoi bad la khmih lynti ba kin dang don bun ha ki snem ban sa wan.
“Kane ka Sorkar kala wanrah ia shibun ki prokram na ka bynta ki nongshongshnong, kiba duk, ki nongrep, ki nongialehkai, ki samla bad terter bad ngi don ka jingkyrmen kaba skhem ha u Conrad K Sangma uba dang samla rangbah bad ba tbit” ula ong.
Une u MLA ula pynpaw “Ha kane ka elekshon ban wan, kiba bun ki MLA ka NPP kin sa jop biang bad ngi sa iohi iaka jingkylla ha Meghalaya”.
