Sngewkhem u ma Pala ban jop palat 30 seat ka Congress
Shillong, Nohprah 23: U president ka Meghalaya Pradesh Congress Committee (MPCC) u bah Vincent H. Pala hynne ka sngi u la pyntip ba haka 29 tarik mynta u bnai ka Party kan sa phah iaki kyrteng jong ki kyrtong shaka All India Congress Committee (AICC) naka bynta ban ioh jingmynjur.
Haba kren sha ki lad pathai khubor u bah Pala ula iathuh ba naka liang ka MPCC kala dep ban ithuh lypa iaki 40 ngut ki kyrtong hynrei iaka rai ba khatduh yn shim hi daka AICC hynrei ka kyrmen ba ka AICC kan ai jingmynjur lut ia baroh 40 ngut ki kyrteng.
U bah Pala ula kam ba ka party ka kyrmen ban pynieng kyrtong ha baroh 60 tylli ki konstitwensi hynrei haduh mynta ka party kam pat lah ban shim iaka rai ba khatduh namar haduh mynta ka party kam pat ioh kyrtong ha kumba 1-2 tylli ki konstitwensi.
“Haka 29 tarik mynta u bnai ka MPCC kan sap hah iaki 40 ngut ki kyrteng ban ioh jingmynjur naka AICC bad naka liang ka Party kan sa pyllait paidbah ruh ia ki kyrteng baka phah shaka AICC khnang ba baroh kin iohi ba ka MPCC kam leh shilliang haba iadei bad ka jingiajied kyrtong” la ong u bah Pala.
U bah Pala u la ong ba watla ka seng kam don wat uwei u MLA shwa ban rung sha ka ilekshon 2023 hynrei ka party ka sngew skhem ban lah leh bha ha kane ka elekshon namar ki don ki MLA barim bad ki MDC ki ban mih bujli ban iakhun naka Party.
U la kam ruh ba katkum ka Statistic kumba 50 percent haduh 55 percent ki MLA jong ka ïngdorbar thawaiñ ka jylla Meghalaya ki ju rem ha man la ki ilekshon.
“Ka seng Congress kan jop kumba 30 tylli ki shuki na ka 40 namar ha ki jaka kum ha Mawphlang, Sohïong bad Nongthymmai, watla ki nongïalam kum u bah Kennedy Khyriem, u bah HDR Lyngdoh bad u bah Charles Pyngrope ki la pynïasoh bad kiwei ki seng hynrei haka jaka jong ki ruh la mih bujli da ki kyrtong kiba khlaiñ” la bynrap u bah Pala.
Nalor kane u bah Pala u la pyntip ruh baka AICC kala ithuh bad kala mynjur ban thaw noh daka Meghalaya Pradesh Election Committee (MPEC) bad u president ka MPCC un dei kum u Chairman, u bah Dr Celestine Lyngdoh kum u Chairman ka Campaign Committee bad u bah P.N Syiem u Chairman jong ka Research and Monitoring Committee.
