Shillong, Nohprah 23: Ka Durbar shnong Mawpait Tlongpleng ka pynpaw ka jingsngew nguh ia ka ophis u Executive Engineer ka PWD (Road) Mawsynram Division bad ia u Chief Engineer kiba la sngap bad shah shkor ia ka jingleit pynsngew jong ka Durbar ia ka jingshah ieh khunswet ka surok hapdeng shnong jong ka shnong Mawpait Tlongpleng (Tlongpleng).
Ka kyrwoh na u Secretary ka Durbar shnong u bah Marius Nongsiej ka pynpaw ba da ki phew tylli ki snem ka surok hapoh shnong kala shah ieh khunswet bad khlem don ka jing maramot hynrei ia katei ka surok la dep ban Siang rong mynta u bnai Nohprah 2022.
Kum ban shu pynkynmaw ka Durbar hapoh ka jingialam u myntri shnong u bah Donboklang Kharlyngdoh ka la leit buh jingujor ha ophis u CE, PWD Shillong kumjuh ruh ka la ioh ban kynduh markhmat ia u bah T.S Basan u EE, ha ka 25 tarik Jymmang 2022 bad naka liang u ophisar u la kular ha katei ka sngi.
Ka Durbar ka pynpaw ruh ka jingsngew nguh ia u contractor uba la pyntrei ia kane ka surok, nalor ka jingbniah ha ka jingtreikam, ka jingsted ruh ka don ha une u contractor.
