Shillong Nohprah 23: U samla Rana Sing Khyriem ula iohrah ia ka nam U Nai Khatsaw Synnia bad ka samla Medari Phylla Kharsohnoh kala rah ia ka nam Lukhimai ha ka jingiakob pyni riam tynrai kaba la pynlong da ka Khasi Students Union Upper Shillong Circle hynne ka sngi thohdieng ha Soso Tham Auditorium, Shillong.
Ha katei ka jingiakob pyni riam tynrai la wan ban iashimbynta da 24 ngut ki samla kynthei bad shynrang na kylleng ka rilum Khasi-Jaintia bad kitei ki samla kila pyni iaki riam ha ki ar tylli ki kylla kata ka Fusion bad ka Riam Leitlat bad hadien kane la pynbud pat iaka kylla tynjuh jingtip ha kaba ki nongbishar kila kylli jingkylli ia kine ki nongiashimbynta.
Ia ka nam Nai Khatsaw Synnia la ioh da u samla Rana Sing Khyriem bad u Wellson Star Kharmawlong ula wan Baar katba u Kitkupar Nongsiej ula wan Balai.
Ia kanam Lukhimai pat la iohrah da ka samla Medari Phylla Kharsohnoh, ka samla Bashimti Sanaitang kala wan Baar bad ka samla Ferinia Kharsyntiew kala wan Balai.
Nalor kane, ka samla Bashimti Snaitang kala ioh iaka khusnam kum ka Nongkren ba tbit tam, ia ka nam Riam Pynwandur kaba khring tam ha ka liang ki shynrang la ioh da u Remi Star Myrthong bad ka samla Ibansara Shylla kala ioh ha ka liang ki kynthei.
Ia ka nam u nongriam Lat ba itynnad tam la ioh da u Rana Sing Khyriem bad ka Nongriam Lat ba itynnad tam ha ki kynthei la ioh da ka samla Labianglang Diengdoh.
U Myntri Sorkar ka jylla u Bah Hamletson Dohling kum u Kongsan bad u Lambokstar Well Marngar kum u Symbud Kongsan kila sam ia ki khusnam sha kine ki nongjop.
