Shillong, Nohprah 06 : Ka United Democratic Party (UDP), kawei na ki seng riewlum ba hehduh ha Jylla, hynne ka sngi ba-ar kala pynbna ia ka thup kyrteng ba nyngkong jong ki 32 ngut ki kyrtong ki ban mih aireng ha ka elekshon MLA-2023 ha Jylla.
Ka UDP ka dei ka paralok ba iatreilang bad ka National People’s Party (NPP) kaba ialam ia ka Sorkar Meghalaya Democratic Alliance.
Haduh 7 ngut ki dei ki MLA ba mynta napdeng ki kyrtong jong ki kyrtong bala pynbna da u President ka UDP bad Lamphang ka Iingdorbar Bah Metbah Lyngdoh, uban mih iareng ban jop biang na Mairang Constituency, ha ka jingialang ba long ha Ophis treikam ka Party ha Shillong.
Ka thup kyrteng bala mynjur da ka State Election Committee (SEC) ki kynthup ia lai ngut ki Myntri Sorkar- ma Kyrmen Shylla (Khlieriat), ma Lahkmen Rymbui (Amlarem) bad Bah Brolding Nongsiej (Mawthadraishan) bad ki lain gut ki MLA ki dei ki Bah Nujorki Sungoh (Mookaiaw), Balajied Kupar Synrem (Shella) bad Pius Marwein (Ranikor).
Ka UDP kala ai ticket ruh ia san ngut ki MDC ba mynta jong ki artylli ki Autonomous District Council (ADC) ba kynthup ia I CEM ka KHADC Bah Titisstarwell Chyne (Sohra) Executive Members – Paul Lyngdoh (West Shillong) bad Bah Mitchel Wankhar (Mylliem) bad arngut ki MDC ka JHADC – Dawan Lyngdoh (Nartiang), Treilang Suchiang (Raliang).
Saw ngut ki MLA barim kila ioh ia ka ticket bad kine ki dei u Bah HDR Lyngdoh (Sohiong), Jemino Mawthoh (Nongthymmai), Luderberth Ch Momin (Kharkutta), Remington Pyngrope (Mawkynrew) lem bad CEM barim ka JHADC Moonlight Pariat (Jowai) uba la ioh ia ka ticket naka party.
Ka UDP kala pynieng ruh ia arngut ki Doktor MBBS ba kynthup ia u Director ka Health Service (DHS) barim Dr Aman War na North Shillong bad Dr Osaphi Smithson Jyrwa na Mawryngkneng bad ki Ophisar barim ka Sorkar ba kynthup ia u Executive Engineer ka PWD Bah Baiahunang Makdoh (Mawhati), shipai bala shongthait Taposh D Marak (Resubelpara) bad u Assistant Director barim ka Agriculture Olan Singh Suin (Mawsynram).
Arngut ki dei ki nongtrei mon sngewbha ba kynthup ia u Bah Anthony Khongwang (Pynursla) bad Rakkam Ch Marak (Bajengdoba).
Kiwei pat ki kyrtong ki kynthup ia u Bah Badhok Nongmalieh (Jirang), Sunshine Makri (Umsning), Polestar Nongsiej (Nongstoin) Subroto G Marak (Mendipathar), Andreash G Momin (Rongjeng), Ronald Rikman Sangma (Salmanpara), Kennethson R Sangma (Dalu) bad Ashahel D Shira (Rajabala).
Hadien ba pdiang burom ia kine ki kyrtong, u Bah Metbah ula ong ba ka don ka jingdonkam ia ka seng sain pyrthei ba laitluid bad ba khlain, kaba lah ban ieng na ka bynta ka jingangnud jong ki paidbah ka Jylla.
“Nga sngew ka don ka lynti ia ka Regional Party ha Jylla ban pynurlong ia ka jingphohsniew jong ki samla bad ka jingdonkam jong ki paidbah ka Jylla, ia kaba ki National Party kim shym la lah ban leh eiei satia” ong u Bah Metbah.
Ula kam ruh “Ha ka UDP, ym ju don satia ki High Command bad ym don satia kata ka jingniew Big Boss.Ta ka daw bun ki briew kiba don jingiadei bad ki National Party kila wan iasoh noh bad ka UDP”.
Haba kren halor ka Sorkar MDA, une u Khliehduh ka UDP ula ong “Ha kane ka Sorkar ba ngi ioh mynta, ka bynta jong ngi ka long kum ka kynhun ban khmih ia ka bha ka miat jong ki paidbah ka Jylla bad ngi la lah ban iada ia ka Jylla na ka jinglehrain”.
U Bah Metbah ula ong ba ha elekshon bala dep, ka UDP kala lah ban jop ia u nombor ba don burom hynrei kam pat shym la biang satia ban ioh thaw ia la ka jong ka Sorkar namar kum ka seng riewlum kam lah ban leh eiei ha ki katto katne ki jaka.
“Ngi kyrmen ba ha u 2023, ki paidbah kin ai ka jingkyrshan ia ngi naba bun ki jaka, ki paidbah ka Jylla ki kwah ban ioh ia ka seng sain pyrthei bala laitluid ban kren” ula ong.
