Shillong, Nohprah 06: Ki don 6 ngut ki nongmareh marathon na ka jylla, san ngut ki shynrang kawei ka samla kynthei kiban leit ban ia shim bynta ha ka lympung ia mareh marathon kaba la tip kum ka International Tata steel Kolkatta 25km ban mareh ha nongbah Kolkata, West Bengal ha ka 18 tarik u Nohprah 2022.
Ia kane ka lympung ia mareh kaba heh ha ka pyrthei la pyniaid da ka PROCAM international ban pynmareh ha ki rta bapher bapher na ka bynta ki shynrang bad ki kynthei.
Ki nongmareh kiban mih khmat ia ka Meghalaya ki kynthup ia bah Badon Sing Tham ha ka kyrdan jong kiba 50 snem, Arbet Nonglang ha ka rta ba 40 snem, Okitlang Syiemlieh ha ka 30 snem, kong Itiris Syiemlieh ha ka rta 40 snem, Mark Marbaniang 20 snem bad Ferick Kitboklang Syiemlieh ruh ha ka rta ba 20 snem.
Kumba shu kdew u bah Badon ha ka 1st edition jong ka International Tata steel Kolkatta 25km ha u snem 2014 u la wan ha ka kyrdan balai da kaba mareh 1 kynta, 38 minit bad 07 sekhon.
Haba ia dei bad kane ka jingleit jong ki u MLA ka Mawlai konstitwensi u Bah Process T Sawkmie hynne ka sngi Hatmajai u la nohsynniang da ka song pisa sha ki lai ngut, kiba kynthup ia u bah Badon, Arbet bad Ferick na ka bynta kane ka jingleit jong ki ha ophis treikam jong u ha Mawlai Nongpdeng.
Ha kajuh ka por u Bah Sawkmie u la kitbok ruh ia ki ba kin ioh khur ia ka jingjop bad ban wanrah nam bad burom ia ka ri bad ia ka jylla hi ruh baroh kawei.
Ha kane ka juh ka sngi u MLA u la sam jersey ruh sha ki samla na Umshor umshor, Mawlai Umthlong na ka bynta ka jingleit iakhun phutbol jong ki.
