Shillong, Risaw 11 : U Myntri kam pohing barim ka Jylla Bah HDR Lyngdoh lem bad u Kaitor ba pawnam ka thain Pynursla Bah Anthony Khongwang ki dei napdeng san ngut kiba la pan ticket na ka United Democratic Party (UDP) ban iakhun ha ka elekshon MLA-2023.
Ia kane la pyntip da u President ka UDP East Khasi Hills Bah Titosstarwell Chyne hadien ba dep pyniaid ia ka jingialang ba kyrpang jong ka Executive Committee hynne ka sngi ba-ar.
U Bah Titos uba dei ruh u CEM ka KHADC bad MDC ka Sohra, u pyntip ba ka District Committee kala ioh ia ki kaiphod na ki Circle ba pynpaw ba ka UDP ka dang khlain bha ha ki 10 tylli ki Constituency ka East Khasi Hills.
“Na kine, ngi la ioh pdiang ia ki application na ki kyrtong, kiba la phah kyrteng da ki Circle. Ka District Election Committee ruh kala mynjur ia kine ki san tylli ki application bala phah da u MLA ka Shella Bah Balajied Kupar Synrem, Bah HDR Lyngdoh na Sohiong, MDC ka Laban Bah Mitchel Wankhar u ban aireng na Mylliem, Bah Olan Sunn na Mawsynram bad u Ban Anthony Khongwang ba Pynursla. Ia kine ki application yn sa phah sha ka State Election Committee (SEC) ba kan ai ia ka jingmynjur kaba khatduh” ula ong.
Kat kum ka jingong jong u, dei tang kine ki san ngut kiba la pan ticket na kine ki Constituency haba pyntip ba ka District kam pat ioh pdiang satia ia kano kano ka application na ki san tylli kiwei pat ki Constituency kata ka Mawryngkneng, Mawkynrew, Nongkrem, Sohra bad Mawphlang.
“Kum u President ka District, ngam lah ban kam ba ngan ioh beit ia ka ticket namar ngi hap ban bud ia ki kyndon” ula ong.
Haba kylli, une u President ka UDP-EKH ula ong ba tang ka Party kaba lah ban pynthikna la u MLA ba mynta jong ka Mawphlang Bah Eugeneson Lyngdoh un dang mih aireng ne em ha ka elekshon ban wan hadien ba kala dep ban thaw ia ka Circle jong ka party hapoh ka Constituency.
“Ngi la dep thung ia ki convener ban thaw ia ka Circle, ka ban sap hah ia ka kyrteng jong u kyrtong ka party” ula ong.
Haba kylli la u Chief Adviser jong ka UDP bad Symbud Myntri Rangbah barim ka Jylla Bah Bindo M Lanong ula pan ticket ne em ban iakhun na Nongkrem Constituency, u Bah Titos ula ong “Ngim pat ap ban ioh pdiang ia ka application na u”.
U Bah Bindo ula ieng pyrshah iaka rai jong ka Party ban ai ticket ia u MLA ba mynta ka Nongkrem Bah Lambor Malngiang ha kane ka elekshon ban wan.
Halor kane, u Bah Titos ula ong ba ym don mano manor uh ba lah ban kam b aka party kan ai ticket sha ki lada kim shym la applai ia ka.
Ha kajuh ka por, kum shibynta ban pynkhlain ia ka party ha ka District, ka UDP kala thung ia u Bah Balajied Kupar Synrem kum u Adviser ka UDP-EKH, MLA barim Bah Remington Pyngrope, Monarch Shabong bad Bah OS Jyrwa kum ki Working President bad u Bah Wellbirth Rani kum u Vice President bad I kong Mary Kharmih kum I Secretary ka Women’s Wing.
