Shillong, K’Lyngkot 20: U bah Tarciscious Mawlot uba dei na ka shnong Mairang, Eastern West Khasi Hills, hynne ka sngi ula mih paidbah ban pynbna ba un iakhun ia kane ka ilekshon MLA ban wan kum u kyrtong shimet na Mawlai konstitwensi.
Haba kren sha ki pad pathai khubor, u bah Tarcisious ula ong ba ka jingmih jong u ban iakhun iaka ilekshon kadei naka bynta ban pynwandur iaka synshar khaddar khamtam ban thaw ain naka bynta ka bha ka miat ki paidbah.
U bah Tarciscious ula iathuh ba u dei ruh rangbah uba la don bynta ha ka jingiakhih shong shah thngan ha u snem 1997 ha State Central Library Shillong ban pyrshah ia ka sorkar jylla halor ki mat jingeh ha ka jylla khamtam haba iadei bad ka bhah thungkam, ki kam pynroi bad kumjuh ruh ban iakhih pyrshah ka jingtih Uranium na kane ka jylla.
“Ka sorkar ba mynta ne ki sorkar jylla barim kim nang shuh ban thaw ain hynrei kila shu pynbna tang ki kam pynroi ki bym wanrah jingmyntoi iaki paidbah hynrei kiba shu lut por tang haka ba buh maw nongrim namar haduh mynta bun ki kam ne ki projek bapher bapher kim pat urlong” la kynnoh u bah Tarciscious.
U bah Tarciscious ula kynnoh ruh ba ki kam pynroi ba ka sorkar jylla ka wanrah naka bynta ki paidbah ruh ki long kiba tang shiteng por namar ka jylla kala sakhi ba ki surok, ki jingkieng wat ka ïing dorbar kila pra ne khyllem noh tang shiteng por.
Ula bynrap ba ka jylla ha kine ki 50 snem ka la mad jingeh bha hynrei kat dang iaid ki sngi kine ki jingeh ki dang jur shuh shuh, kumta ka pynlong ia u ban shim ka rai ban mih madan sha ka lympung ilekshon 2023.
Ula ong ba kum u kyrtong u kwah ban thaw da ki ain kiba khlain kiba lah ban kyntiew iaki paidbah bad iaki samla ban skhem jingmut ban trei naka bynta ka bha ka miat ki paidbah bad ka jylla baroh kawei.
“Kum u kyrtong shimet, ngam kwah ban kyrpad iaki paidbah ban kyrshan ne jied ia nga hynrei tang kawei nga kyntu iaki paidbah ban pyrkhat bha haba ki leit thep Vote namar ka jylla kala donkam shisha kita ki nongthaw ain naka bynta ka bha ka miat ki paidbah bad ka jylla baroh kawei” ula ong.
