Shillong, Rymphang 01: U Samla Richard Nongbsap uba long tang u nongbylla, hynne ka sngi ula mih shakhmat ban leit thep kyrteng ban iakhun iaka MLA Election na Mylliem Constituency kum u kyrtong shimet.
U Samla Richard uba la don 27 snem ka rta, ba shong ba sah ha Umlyngka ula iathuh ba ula thep kyrteng ban iakhun iaka elekshon na Mylliem Constituency kum u kyrtong khlem seng.
“Ka jingmih ka jong nga ban shah jied kum u nongthaw ain ka long ban wanrah da ka Ain u no u MLA ba bamsap, kiei ki ophisar kiba bamsap, katno ki ioh tulop, katno ki pynlut bad naei dei ki ioh shuh shuh iaka pisa bad ngan ym shah ia ki MLA ban sam pisa khlem ka jingthoh ban iada iaka bamsap” ong u Richard.
Ula ong, ba lada u shah jied un wanrah iaka rukom treikam kaba khuid ba suba bad katno dei ban siew ia ka khajna kali namar lehse ka bai khajna ka long tang T.300 hynrei ki nongdie ki shim haduh T.15,000 bad yn wah ia ka aiñ ha DTO kiban thoh shai ha ka ktien Khasi bad Garo.
“Ban iada ia kiba tlot bor da ka lynti jong ka Aiñ bad ngan wad jingtip katno ngut kiba ïap lok, kiba don ia ki nongpang bamduh ha ïing kum ki dkoh kti dkoh kjat, pangbiej bad ïap shilliang ter ter bad ban tip katno ngut na ki bahaiing kiba trei kam kontrak, kam sorkar ter ter khnang ban nang kumno ban iada da ka lynti ka aiñ bad ban ym noh shilliang ka aiñ” ong u Richard.
Ula ai nuksa ba ki don ki khep ba iaki skhim jong kiba duk la ioh pynban da ki heh spah namar ka jingbym biang ka aiñ bad ula ong lada ym lah ban pyndep ia kitei ki jingkular ha ka samoi treikam kaba nyngkong yn bteng biang ban pyndep ha kawei pat ka samoi treikam.
“Nga trei kum u nongbylla, nga la trei ruh kum u nongkhaïï jaiñ, shna rnga khyndew, lum ia ki tin jot, bylla thoh phlang masi bad kiwei kiwei ki jingtrei” ong u Richard bad bynrap ba ula jied iaka CCTV Camera kum ka shap elekshon namar ba u ieng haka nongrim jong ka khuid ka suba.
“Nga mih iakhun iaka elekshon na Mylliem Constituency kaba dei ka constituency kaba la shai bad nga dei uba duk uba kyrduh bad nga don jingkyrmen ba na kane ka Constituency wat kiba duk ruh kin kham don ia ka thong ban poi sha ka thong” ula ong.
Haba kylli kaei kaba u iohi iaka rukom treikam jong u MLA ba mynta jong ka Mylliem, une u samla ula ong, “Ia kata ngam lah ban kren ne ban kynthoh eiei namar nga mih kum u nongthawaiñ bad ngan iaid beit da ki mat lajong kumba nga la kren”.
