Shillong, Rymphang 03: U Kyrtong ka Congress na Pynursla Constituency Bah Nehru Suting ula ong ba lada ki paidbah ki kwah ba ka jylla Meghalaya kan iatylli bad kan long kawei, la donkam ban pynduh noh ia ka bhah ioh kam ioh jam lane ka Reservation Policy.
U Bah Nehru ula kren ia kane hadien ka jingthep kyrteng kum u kyrtong ka Congress ban aireng ha kane ka elekshon MLA-2023 na Pynursla pyrshah ia u National Vice President ka NPP bad Symbud Myntri Rangbah ka Jylla Bah Presttong Tynsong.
Haba kren sha ki lad pathai khubor u bah Nehru Suting u la ong ba ha Meghalaya ka jur bha ka jingkyrduh kam bad kane kadei namar ka jingbym treikam bha ka bhah thungkam lane la Job Reservation Policy bad dei namar kane la donkam ban iakren pynbeit halor kane ka phang.
Ula ong ba haka jingshisha ym donkam iaka bhah thungkam lane ka Job Reservation Policy namar ki nong shong shnong ka jylla kidei tang Khasi, Jaintia bad Garo bad dei namar kane iaka bhah thungkam ruh dei ban ailad tang naka bynta kine lai tylli ki jaidbynriew.
“Lada ngi ia kwah ban wanrah ka jingiatylli hapoh ka jylla baroh kawei dei ban pynduh noh ia ka bhah thungkam lane ka Reservation Policy bad ia kane ka Policy dei ban long beit tang kawei kata u Khasi, u Jaiñtia bad u Garo” la
U bah Nehru ula kam ruh ba ka seng Congress ka don ia ka jhad kaba thymmai bad kaba dei da ka nar ym shuh kaba lah ban ngam hapoh um kum ha ki snem kiba lah dep.
Shuh shuh ula kam ba u la tikna ba ha ka sngi pynbna ïa ka resolt kata ha ka 2 tarik u bnai Lber 2023 un sa long u ba nyngkong namar ki paidbah ka thain Pynursla kila kwah ka jingkylla hapoh ka thain.
