Aizawl, Risaw 27 : U General Secretary ka All India Congress Committee Jairam Ramesh ha ka sngi Thohdieng, ula ther tyngeh ia ka BJP da kaba kynnoh ba kane ka Party kala pyndonkam ia ki seng riewlum ban ioh bat ia ka bor synshar hapoh ka thain Shatei Lam Mihngi ka Ri.
Ula ong, kala leh ha Arunachal Pradesh, Meghalaya, Manipur bad mynta kala pyrshang ban pyndonkam da kajuh ka buit ha Mizoram.
Une u Nongialam bala rangbah bha jong ka Congress ula khein ia ka BJP kum ka party rngai bad ong ba ka bor jong ka rngai halor ki artylli ki party, ka ZPM (Zoram People’s Movement) bad ka MNF (Mizo National Front) ba bat ia ka bor synshar, ka dei kaba la iatip lut da baroh namar ki dei kine ki khyrdop jong ka BJP ban wan rung sha Mizoram.
Une u Nongialam ka Congress ula ong ba ka ZPM ka dei ka party ka bym don satia ia ki mat treikam, ka bym don satia ia ka nongrim haba kynthoh ruh ba ka MNF bad ka BJP ki dei ki arliang jong kajuh ka pisa.
Haba kdew ia ki jingbym lah treikam ka Sorkar MNF, ula pynpaw ia ka jinglyngngoh ba ha kine ki laisnem, ka Jylla kam shym la ioh satia ia ka grant ba kot haduh T. 3500 klur na ka Sorkar Pdeng watla ka MNF ka dei shibynta jong ka Sorkar NDA ba ialam da ka BJP.
Lah ban kdew hangne ba ka MNF, ka Liang Pyrshah ZPM, ka Congress bad ka BJP kila rai ban pynieng kyrtong ha baroh 40 tylli ki constituency.
Ka elekshon sha ka Iingdorbar Thawain ki 40 ngut ki Dkhot kan long ha ka 7 tarik Naiwieng bad ka jingniew vote kan long ha ka 3 tarik Nohprah.
