Shillong, Rymphang 21 : Ki pulit ka jylla hynne ka sngi Thohdieng kila rejistar case bad kila pynlong ia ka jingtohkit ban kem ia kiba donkti ha kaban pynduh bad pynjulor ia ki Electronic Voting Machine (EVM) ha ki 4 tylli ki polling station kiba hap ha ki 2 tylli ki constituency ka East Jaintia Hills District.
Katei ka jingjia kala pynlong ia ka tnad District Council Affairs ka jylla ban pynbna pynlong biang da kawei ia ka jingthep vote ha ki 4 tylli ki polling station ba kynthup ia ka Wapung Skur A bad Wapung Skur B kaba hap ha ka Musniang-Rangad constituency bad ha Bataw A bad Bataw B kaba hap ha ka Bataw-Lakadong constituency.
“Ngi lah dep ban rejistar case bad ka jingtohkit kala iaid shakhmat” ong u heh pulit ka District u Giri Prasad.
Ula ong, ba haduh mynta kim shym pat la iohkem iano iano ruh ha kaba iadei bad katei ka jingjia.
Hashwa kane, u Director General (Eastern Range) u Davis NR Marak, u Deputy Commissioner u S Awasthi bad u SP Giri Prasad kila leit mardor sha ka shnong Wapung ban pynlong ia ka jingtohkit halor katei ka jingjia.
Ka Additional Deputy Commissioner (ADC) bad ka Returning Officer Kong Jacquiline Kharpuri kala iathuh ha ki nongpathai khubor ba ka jingthep vote kala long kaba iaid beit bad kaba jai jai haduh ka por 11.20 mynstep hynrei ha ka por 11.35 mynstep la ioh pdiang ia ki jingtip ba ka kynhun jong ki briew kiba ym lah ban ithuh kila leit rung jubor ha ka jaka thep vote ha Wapung Skur A ha kaba kila pynjot bad pynjulor ia ki kor EVM.
Ka iathuh, kumjuh ruh ha ka por 11.37 mynstep, la pyntip ba katei kajuh ka kynhun kala leit sha ka jaka thep vote jongka Wapung Skur B bad kala pynduh bad pynjulor ia ki EVM. Kane kala pynlong ban hap ban pynsangeh noh ia ka jingthep vote ha kitei ki ar tylli ki jaka thep vote.
“Ym shim la don mano mano ruh na ki nongpyniaid elekshon kiba lah ban ithuh ia kitei ki briew bad ym shym la tip hi ruh la kitei ki briew kiba wan ki dei na ka shnong ne kiba nabar shnong.
U SP Giri Prasad ula pyntip ba la wanrah shuh ia ki bor pahara ha kitei ki ar tylli ki jaka thep vote ban pynthikna ba kan ym don kano kano ka jingpynthud ia ka shongsuk shongsain.
“La dep ban rejistar ia ka case bad ka jingtohkit kala iaid shakhmat ban iohkem ia ki briew kiba donkti ha katei ka kam sniew” la ong u SP.
