Shillong, K’lyngkot 27 : U MDC ba mynta ka Laitumkhrah-Malki Bah Fantin Joseph Lakadong haka sngi Nyngkong, ula leit thep kyrteng kum u kyrtong ka NPP ban iakhun ia ka elekshon MDCsha ka Iingdorbar ka Khasi Hills Autonomous District Council (KHADC), ka ban long la 21 tarik Rymphang.
U Bah Lakadong uba dei ruh u Executive Member (EM), u dei uba nyngkong eh ban thep kyrteng sha kane ka elekshon. Ia u Bah Lakadong la synran da ka kurim bad Myntri Sorkar Kong Ampareen Lyngdoh lem bad ki nongialam bad nongkyrshan ka party.
Ula thep kyrteng hakhmat u Returning Officer (RO) ha Inter-State Bus Terminus(ISBT), Mawlai Mawiong.
Haba iakren bad ki nongthoh khubor, u Bah Lakadong ula pynpaw ba um iohi satia ia ka jingisih ia ka EC ka KHADC ka ban treikam pyrshah ia ka NPP, kaba ialam ia ka EC hapoh ka Council.
“Kane ka long namar ngi la leh shibun kiei kiei hapoh ka Council. Ngi la mynjur ia bun tylli ki bill. Ngi la iatreilang bad ka Tnad DCA bad u Lat ka Jylla. Nga kwah ban ai khublei ia u Lat halor ka jingai jingmynjur ia bun tylli ki bill ba sahteng jong ngi” ula ong.
Ym kum ha JHADC bad GHADC, une u EM ula ong “Haduh mynta, ha KHADC jong ngi, ka tulop ki nongtrei kam ju sahteng satia”.
Haba pynpaw ia ka jingsngewskhem ba ka NPP kan wanphai biang sha ka bor ha KHADC, u Bah Lakadong ula ong “Ngi don ka jingngeit kaba skhem ban gin thaw biang ia ka EC ba thymmai”.
“Baroh ki MDC jong ngi ba mynta kila leh iala ka jong ka bynta bad kila trei shitom ba kiei kiei baroh kila iaid beit iaid ryntih. Ki ju don beit bad ki paidbah bad kumta nga ngeit skhem ba ki kyrtong jong ngi kin ioh ia ka jingjop” ula bynrap.
Haba kren halor kiwei kiwei ki kam, u Bah Lakadong ula ong ba un pynthikna ba ka Ktien Khasi kan long kongsan bha ha ki jingpule jong ki kyrdan Primary.
