Shillong, Rymphang 21 : U President ka National People’s Party (NPP) Meghalaya bad Symbud Myntri Rangbah Bah Prestone Tynsong, ula pynpaw ia ka jingsngewskhem ba ka party jong u, kan khur ia ka jingjop ha kane ka elekshon KHasi Hills Autonomous District Council (KHADC) bad Jaintia Hills Autonomous District Council (JHADC).
Hadien ba pyndep ia ka jingthep vote, u Bah Prestone ula ong “Kum u nongialam ka party, ngi la iaid kylleng ki jaka ka Ri-lum Khasi bad Jaintia bad ngi la iohi ba ka jingkyrmen ka don ha man kawei pa kawei ka constituency lait noh ha ki katto katne kaba don ka jingiakhun. Kumta, ngi sngewskhem ba ngin jop ia ka elekshon ha baroh kine ki ADC”.
“Ka NPP kala kut jingmut ban shakri ia ki paidbah bad kaJylla lyngba ki lai tylli ki ADC lada ki paidbah ki ai ia ka rai jong ki” ula bynrap.
Haba kylli, u Bah Prestone ula ong ba ka party kala leit rung ha manla ka shnong ban pynsngew ia ki kam pynroi bapher bapher bad ka jingkongsan ban don ia u MDC u ban iarap lem ia ka Sorkar ha kaban wanrah ia ka roi ka par ha baroh ki liang sha kawei pa kawei ka constituency bad ban nang pynkhlain ia ki ADC ba kin ai ka jingiada ia ka Jaidbynriew.
U Bah Prestone, uba la mihkhmat haduh san samoi na Pynursla constituency, ula pynpaw ruh ia ka jingsngewskhem ba u pyrsa bad kyrtong ka NPP na Langkyrdem-Laitkroh Bah Rahboklang Tynsong bad ka MDC ka Nongshken Kong Grace Mary Kharpuri kin ioh ia ka jingjop ha kane ka elekshon.
