Shillong, Nailar 06: Ka United Democratic Party (UDP) ka la shim ia ka rai ban sdang pynkhreh noh ia ki kam ki jam na ka bynta ka elekshon Autonomous District Council (ADC) kaban sa long shen.
Haba kren sha ki lad pathai khubor hadien ba la wai ka jingialang ka CEC, u President ka UDP Bah Metbah Lyngdoh u la ong, “Ngi dang hap ban tip lano kan long ka elekshon ADC hynrei ngi sngew ba ka la dei ka por ba ka Party kan pynkhreh bad pynkhlain ialade ha jylla, district bad block kum shi bynta ban pynkhreh ia ka elekshon.”
“Ngi dang hap ban khot ia ki aplikeshon hynrei ngi la sdang ia ka jingtreikam. Ngi la bthah ïa ki Block bad ki District ba kin sei ïa ki kyrtong,” u la ong.
Ka Sorkar kala pynjlan ia ka por treikam jong ki ar tylli ki ADC kata ka KHADC bad Jaintia Hills Autonomous District Council (JHADC) na ka bynta hynriew bnai, kaba shen kan sa kut noh.
Katkum ka jingong jong u, kiba bun na ki MDC ba dang shong jong ka party, kin iakhun ban shah jied biang ha kane ka elekshon ADC ban wan.
Haba kylli, u Bah Metbah ula ong ba ki MDC na kiwei pat ki Party ruh ki la pynpaw ba ki kwah ban iakhun ia kane ka elekshon da ka tiket UDP. “Ngi dang don ha ka jingiakren shwa ban rai ia kane ka kam”, u la bynrap.
U President ka UDP u la kyntait ruh ïa ki jingkynnoh ba ki don ki MDC bad MLA jong ka Party kiba thmu mih noh bad ula ong “Kadei tang kaba shu mutdur khlem kano kano ka jingshisha ha ka”.
La ka VPP ka long ne em ka jingma ïa ki seng thaiñ, u Bah Metbah ula ong, “Ngi la pynkhreh ban ïakhun bad kano kano ka seng saiñpyrthei ha kane ka elekshon MDC ban wan. Ngin ïakhun da kaba pynshong nongrim ha ka bor bad ka nongrim jong ka Party”.
Ula pynskhem ruh ba ka UDP bad ka paralok Hill State People’s Democratic Party (HSPDP) kin dang ïai bteng ban ïatreilang hapoh ka Regional Democratic Alliance (RDA) daka ba ong “Ngi shai bha halor kane ba ka RDA kan dang bteng”.
Ha kajuh ka por, ka seng ka la iakren ruh halor ka kaiphod halor ka jingbym lah ka UDP ban jop haka elekshon Lok Sabha na Shillong parliamentary seat.
