Shillong, Nailar 06 : U Myntri Sorkar Rakkam A Sangma ha ka sngi Ba-ar ula ong ba ka jingiarap ia ki nong India kiba sah ha ri Bangladesh, ka dei ban long da kaba pynshong nongrim ia ka jingsngew para briew ym da ka niam.
Ula kren ia kane haba thew sha ki paid Khasi-Pnar bad ki Garo kiba sah ha Bangladesh, kaba don mynta hapdeng ka thma iaumsnam bad jingbym shongsuk.
“Ngim lah ban tip kaei kaban jia lashai. Shu khein…lashai baroh ki paid Khasi-Jaintia bad Garo kiba sah ha khappud jong ka Ri Bangladesh, lada don kano kano ka jingjia, hooid khlem pep kin pyrshang ban wan riehtngen ha ka Ri bad Jylla jong ngi bad nga sngew ba ngi dei ban wad ia ki lad ki lynti hato ngin on gem lane ngi dei ban iarap ia ki halor ka jingsngew para briew ia kaban sa shim rai da ka Sorkar India” ong u Rakkam haba iakren bad ki nongthoh khubor.
Haba kylli, u Myntri ula ong “Nga sngew ba ngim dei ban iaid da ka niam. Ki don bun ki Garo, ki bym dei ki Hindu, ki dei ki Khristan. Ki don bun ki Khasi bad Jaintia kiba dei ki Khristan bad bym dei Khristan. Lada ngi rai da ka niam hooid kin don kiba ioh jingiarap bad kin don ruh kiba duh. Nga sngew ha ngi shimet ba lada ki dei ki ST klet noh ia ka niam”.
Ula ong ba ka dei ka jinglong hi ba ngi don jingsngew synei ia ki briew kiba dei na kajuh ka jaidbynriew. “Ngim tip ki bud ia ka niam aiu hynrei ki dei na kajuh ka Jaidbynriew”.
U Rakkam ula ong ba ka jinglong jingman ha Bangladesh hi khlem pep kan ktah bha ia ki briew jong ngi la ki dei kiba don hapoh ne shabar ka Bangladesh.
