Shillong, Nailar 06 : U Myntri Rangbah ka Jylla Conrad K Sangma ula kyntu ia ka Sorkar ba pyniaid shipor ia ka synshar khadar ha Bangladesh ba kan tem ia ka jinglong jingman hapoh ka Ri bad ban iada ia ka jingnang duh ki mynsiem bad ki nongkynti.
Kane ka jingkyntu kala mih hadien ka jingshah pynpra u mot sahnam jong u Nongiakhun laitluid ka Ri-lum Khasi, U Tirot Sing Syiem, ba pynieng ha phyllaw ka Indira Gandhi Cultural Centre (IGCC) ha Dhaka, ka Nongbah jong ka Bangladesh.
“Ki paidbhur ha ka sngi Ba-ar kila hiar thma ia ka Indian Culture Centre ha Bangladesh bad pynpra dusmon ia u mot jong u Tirot Sing Syiem, U Syiem Khasi uba dei uwei na ki nongiakhun laitluid ba nyngkong eh ka Ri India. Ki dur bad video jong ka jinghiar thma kala paw ha ki social media bad saphriang paidbah ha Meghalaya, kaba lam sha ka jingpynrem jur na baroh ki liang” ong u Myntri Rangbah ha ka Facebook account jong u hynne ka janmiet sngi Ba-ar.
“Watla ka jinglong jingman ha Bangladesh ka dei ka kam pohiing jong ki paidbah ka Bangladesh, ngi kyrmen ba ka Sorkar ba shipor kan tehlakam ia ki jingjia bad ban iada ia ka jingnang duh ki mynsiem bad nongkynti” ula ong ha kane ka jingkyntu.
Ka kynhun ki paidbhur kila iaid pynpra dusmon ia ki jingtei bapher bapher ha kylleng ki jaka ka Ri Bangladesh hadien ba ka Myntri Rangbah Duh ka Ri ka Sheikh Hasina kala iehnohkam bad phet krad napoh ka Ri. Ki shipai kila shimti ia ka bor synshar khadar bad thaw ia ka Sorkar ba shipor hynrei kala mih pat ka jingiatai kaba jur hapdeng ki nongthaw ain ba kin shah kynthup lang ha ka Sorkar.
Ka jingiakhih ha kane ka Ri kala sdang naduh u bnai Jylliew mynta u snem halor ka Reservation Policy ban ai bhah thungkam ia ki pateng jong ki riewshlur ka thma laitluid ka Bangladesh ha u snem 1971, da kaba buh haduh 30 percent ka bhah ia ki ban iohkam Sorkar.
Kane ka jingiakhih kala poi sha ka jingiaumsnam ha u Naitung ha Dhaka University hadien ba katto katne ngut na ki nong iakhih kila iap ha ka jingiatynjuh bor bad ki bor Pulit lem bad ki kynhun ba kyrshan ia ka Sorkar. Kane ka jingiakhih kala saphriang steed bha sha kiwei ki jaka sor bad hadien kala pur sha baroh kawei ka Ri, kaba lam sha ka jingiap ia palat 300 ngut ki briew.
Watla ka Iingkashari Supreme Court kala pynduna ia kane ka jingai bhah sha ka 7 percent, ka jingbthah jong ka Hasina ia ki shipai ban pyndonkam da ka bor nalor ka jingkhang ia ka kor internet bad ka telephone bad ka jingpynjari korphiw, kala nang aiding pynban ia ki jingiakhih. Hadien ka jingkynjah ba katto katne sngi, ka kam umsnam kala khie biang ha ka sngi U Blei, kaba shim ia kumba 100 ngut ki mynsiem briew tang ha kane ka sngi.
 ha Dhaka, ka Nongbah jong ka Bangladesh.){kind=link}