Arngut ki Nongthoh khubor kin mih iakhun ia ka elekshon
Shillong, Naiwieng 13 : Ka Voice of the People Party (VPP) kala pynmih ia ka thup kyrteng jong ki kyrtong ki ban aireng ha ka elekshon MDC sha ki artylli ki Autonomous District Council (ADC)-ka Khasi Hills Autonomous District Council (KHADC bad Jaintia Hills Autonomous District Council (JHADC).
Ia kane ka thup kyrteng ki kyrtong la pyllait paidbah hynne ka sngi Balang da u Dr Kara H Chen, Chairman, State Election Committee ka VPP bad u Dr Londoner M Sohtun, Secretary ka State Electon Committee.
Ha ka elekshon KHADC, ka VPP ka dang pynbna tang 27 ngut ki kyrtong ki ban aireng ba kynthup ia 2 ngut ki Nongthoh Khubor kiba la rim bha ka Jylla.
Kine ki nonthoh khubor ki dei u Bah Powell Sohkhlet ban aireng na Pariong constituency bad u Bah John Thabah ban aireng na Sohra.
Ka Mawlai constituency, kaba ki paidbah ki phaikhmat bha namar ka jingjop kput jong ka VPP ha ka elekshon MLA-2023, ka ticket ha kane ka elekshon MDC kala leit sha u Bah Eddieson Kharumnuid.
Ha ka elekshon JHADC, ka VPP ka dang pynbna tang 24 ngut ki kyrtong ba kynthup ia 4 ngut ki kyrtong kynthei.
