Shillong, Nohprah 08: Ka EKH District Election Committee ka United Democratic Party (UDP) kala pdiang ia ka kyrteng jong ki 4 ngut ki kyrtong ban iakhun iaka elekshon MDC sha Khasi Hills Autonomous District Council (KHADC) na ki 4 tylli ki Constituency kiba don hapoh ka nongbah Shillong.
U Secretary Bah Allantry Franklin Dkhar ula pyntip lyngba ka kyrwoh khubor ba ka District Election Committee kala pdiang ia ka jingtyrwa ia ka kyrteng jong ki 4 ngut ki kyrtong kiban iakhun iaka elekshon MDC na ki Constituency kiba don ha ka nongbah Shillong.
Kine ki 4 ngut ki kyynthup ia u MDC ba mynta u Bah Mitchel Wankhar na Laban – Mawprem, u Bah Auguster Jyrwa na Jaiaw, u MDC barim u Bah James Ban Basaiawmoit na Mawkhar – Pynthorumkhrah bad u Bah Desmond K L Mawlong na Nongthymmai Constituency.
La pyntip ruh ba ka District Election Committee kan sa phah ia kitei ki 4 tylli ki kyrteng sha ka State Election Committee jong ka UDP.
