Shillong, Nohprah 17 : Ka Sorkar Jylla ha ka sngi Ba-ar, kala pynbna ba ka jingiathep vote ban jied thymmai ia ki MDC sha ka Iingdorbar Thaw Ain ka Khasi Hills Autonomous District Council (KHADC) bad Jaintia Hills Autonomous District Council (JHADC) kan long ha ka 21 tarik Rymphang, 2025.
Haba kren sha ki lad pathai khubor, u Symbud Myntri Rangbah ba khmih ia ka District Council Affairs (DCA) Bah Prestone Tynsong ula pyntip ba u Lat ka Jylla ula mynjur ia ka jingai jingmut jong ka kynhun Myntri kaba la pynshong nongrim na ka jingtyrwa jong ka Tnad DCA ban pynlong noh ia ka elekshon sha ki Iingdorbar jong kineki artylli ki District Council.
U pyntip ba ia ka jingpynbna jong kane ka elekshon MDC yn sa pynmih ha ka 27 tarik Kyllalyngkot ka ban bud da ka jingiathep kyrteng ki kyrtong naduh ka 28 tarik Kyllalyngkot haduh ka 3 tarik u Rymphang. U pyntip ba ha kane hi ka sngi yn sa pyndep ia ka jingbishar ia ki kot ki sla ki kyrtong bad ka sngi ba khatduh ia ki kyrtong ban weng kyrteng kan long ha ka 4 tarik Rymphang.
“Ka sngi ban iathep vote kan long ha ka 21 tarik u Rymphang bad ia ka result yn sa pynbna ha ka 24 tarik Rymphang” ong u Bah Prestone.
Shuwa kane, u Symbud Myntri Rangbah ula pyntip ba ka sngi ban pynmih ia ka draft electoral roll kan long ha ka 13 tarik u Kyllalyngkot bad ka sngi ba khatduh ban iakam kyrteng ne pyrshah kan long ha ka 22 tarik Kyllalyngkot. U pyntip ba ia ka electoral roll ba khatduh yn pynmih ha ka 27 tarik u Kyllalyngkot.
Haba kylli, u Bah Prestone u pyntip ba kat kum ka ain, ka Model Code of Conduct kan treikam naduh ka sngi ba pynmih ia ka jingpynbna kata naduh ka 27 tarik u Kyllalyngkot. Ka MCC kan treikam hapoh u pud u sam ka KHADC bad JHADC.
Haba iadei pat bad ka jingpynlut ia ka elekshon, u Bah Prestone ula ong ba ka pisa na ka bynta kane ka kam yn sa khate na ka bhah ba dei ban ai sha ka KHADC bad ka JHADC.
