Guwahati, Nohprah 17 : Ka seng Hindu-Kutumba Surakshya Parishad (KSP) kala byrngem biang ia ka Sorkar Jylla ba ka dei ban plie noh ia ka Krem Mawjymbuin hapoh ka 23 tarik Nohprah ban ioh lehniam ki Hindu lem kumta ka Meghalaya kan hap ban mad ia ka jingpakhang surok.
Kane ka kynhun kala khot biang ia ka Sorkar Meghalaya ba ka dei ban lum ia ka jingialang bad baroh ki kynhun haba iadei bad ka jingplie biang ia ka krem Mawjymbuin ban ioh lehniam ki Hindu. Ka kynhun kala buh ia ka 23 tarik Nohprah kum ka sngi ba khatduh ban pynlong ia ka jingialang bad ban pynbeit iaka jingleit jurip sha krem Mawjymbuin.
Kala maham da kaba ong “Ka jingbym lah ban pynurlong ia kine ki jingdawa kan lam sha ka jingpakhang ia ka surok ha Jorabat (marjan ka Guwahati) hashuwa ka Khristmas”.
“Ngi kyrpad ia ka Sorkar Meghalaya ba kan pynbeit ia ka jingialang bad baroh ki kynhun haba iadei bad ka krem Mawjymbuin bad pynbeit ruh ia ka jingleit jurip jong ngi sha ka krem hapoh ka 23 tarik Nohprah. Lada ki jingdawa jong ngi kim urlong, ngin bat beit ia kaei kaba ngi la thmu bad ka Sorkar kan hap shim ia ka jingkitkhlieh marwei ia kaei ka ban jia” ong u President ka KSP Satya Ranjan Borah ha ka jingiakynduh bad ki lad pathai khubor ha ka sngi Ba-ar.
U Borah ula ban jur ia ka jinglong kongsan kane ka krem (Mawjymbuin) ia ka kolshor bad ka jinglehniam khamtam ka jingdon u shivling ( mawjymbuin) hapoh jong ka, kaba la mane la slem bha da ki riewngeit Hindu. Ula ban jur ia ka hok jong ki Hindu ban mane ha kane ka jaka haba pyniahap ia ka jinglong kongsa bad kiwei ki jingtei ka mariang kum ka ‘Kedarnath Shivling’ kaba dei ka jaka mane Blei da ki spah snem hashuwa ba ka niam Khristan kan wan sha Meghalaya.
