Shillong, Iaiong 15: Naduh ka jingiakynduh lang jong ka Coordination Committee kaba la long ha u bnai Lber mynta u snem hapdeng ki paralok ka NDA ha ka jylla, ki nongkitkam ka Bharatiya Janata Party na baroh ki district jong ka Shillong Parliamentary Constituency kila trei minot bad shitrhem ban pynioh jingjop ia ka kyrtong NPP na Shillong Lok Sabha Seat.
Haduh Shiphew hajar ngut ki nongtrei shitrhem ka BJP kila trei minot tyngeh ban pyntikna ba ka jylla Meghalaya kan ai bhah lang ha ka jingioh Nongmihkhmat ha ka sorkar NDA kaba ialam da u Narendra Modi, ka sorkar kaban wanphai biang ha ka sien kaba Lai, ia kaba la iathuh lypa da ki nongpeitngor ha kine ki khyndiat bnai ba la dep.
Katba ka jingialap elekshon kala nang jam sha ka sngi ban jied noh ia ki Nongmihkhmat, ka jingpynlong ia ki jingialang kala nang rhem nang rhem, wat u Nongmihkhmat ka BJP u Bah Sanbor Shullai ula pynlong bun tylli ki jingialang ha Kench’s Trace, Laban bad Cantonment Area ban kyntu iaki nongbud ban thep bad shon ha ka shap jong ka Kot mynta kynti ha ka elekshon MP.
Hashwa kane, ha ki sngi kiba ladep, ka kong Priyambada Blah kaba long ka Hehduh ne President jongka BJP ST Morcha bad ka Kong Eunesscy Khyriem ka General Secretary kila leit ialap elekshon na bynta ka Kong Ampareen Lyngdoh ha Nongrang bad Thangmaw ha Eastern West Khasi Hills.
Ha kitei ki jingialang la donlang ruh ki hehduh na ka distrik kiba kynthup ia ka Kong Wanpynbiang Nongtariang bad u Bah Pranes Nongrang bad ka Kong Sunita Swer bad kiwei kiwei.
La pynlong ki jingialang ruh ha ki San tylli ki Mandal kiba hap hapoh ka jingpeit jong u hehduh ka Ri- Bhoi distriict u Bah Sen Thabah bad la iohi ruh ia ka jingbun jong ki nongwan sngap, ha ri lum Jaintia ruh ba la pynlong da u distriict President Bah Commanderful Sana bad ki nongtrei ba shitrhem, ha kaba la donlang u Bah David Kharsati u dkhot jongka BJP National Council bad u Bah Wankitbok Pohshna u Secretary General ban ai mynsiem ha ki jingialang paidbah.
Ka OBC Morcha ruh kala shimbynta lang ha kaba ka la pynlong jingialang ha Nongpoh, kaba la ialam da u Maneshwar Singh, ha kaba la donlang ka Kong Dell ka General Secretary ka East Khasi Hills bad u President ka OBC u Arun Kumar bad u President ka BJP Kisan Morcha u Bah Ralden V Shabong ula donlang ban ai ka jingkyrshan ia ka kyrtong jong ka NDA.
Ka BJP Mahila Morcha hapoh ka jingialam ka Kong Susuki Pariat bad ka BJYM- Youth Wing ba la ialam da u Mewanker Lyngdoh kila trei shitom khlem shongthait kiba la pynlong ki jingialang bad jingiakynduhlang kaba shongkun kiban ialam sha ka jingjop.
Ka BJP Mahila Morcha bad ka kynhun kila trei shitom ha kaba kila leit ialap elekshon ha man la ki thliew iing na ka bynta ka kyrtong ka NDA ka Kong Ampareen Lyngdoh ha Shillong bad ruh ha kiwei kiwei ki jaka.
Ha kaba peit iaka jingtrei minot jong ki kynhun naduh ki Nongialam, ki dkhot bad ki nongtrei mon sngewbha jong ka seng BJP ha Meghalaya, kila sngew tikna ba ka NDA kan rah ia ka jingjop mynta ka kynti bad mynta ka kynti ka BJP kan tam ia ka 400 ngut ki dkhot ha iing Dorbar Thawaiñ ka ri.
