Shillong, Iaiong 05 : U President ka MPPC bad MP ba mynta Bah Vincent H Pala ha ka sngi Palei, ula pynpaw ia ka jingsngewskhem ba ki paidbah kin ai biang ka jingshaniah ha ka party bad vote ia u ha kane ka elekshon Lok Sabha ban long la 19 tarik Iaiong.
Ula kam ruh ba bun ki nongkyrshan ka United Democratic Party (UDP), National People’s Party (NPP) bad Bharatiya Janata Party (BJP) kila kyrshan ia ka Congress ha Meghalaya.
Haba iakren bad ki nongthoh khubor shabar jong ka rynsan ialap elekshon ha Jowai,u Bah Pala ula ong ba ka elekshon kala nang itynnad bad nang eh nang eh katba nang iaid ki sngi.
“Ngim lah ban shu khein sting ia ki briew bad ngim lah ban kam ruh ba ngin jop ne rem ha kano kano ka elekshon hynrei nga sngew ba katba ngi dang jam shajan jong ka elekshon, ki paidbah kila nang sngewthuh bad ngi la nang ioh ia ka jingkyrshan” ula ong.
Haba pynpaw ba ka Congress kala mad ia ka jingeh namar ba bun ki Nongialam kila shah tan ha ki seng sain pyrthei bapher bapher, u Bah Pala uka ong “Ngi don khyndiat ngut ki nongtrei ha madan hynrei nga la iohi ba ki Nongialam Niam kila mih shakhamt bad ki nongshongshnong kila mih shakhmat. Nga kmen ban iohi ba ki khlieh nongsynshar shnong kila wan shakhmat namar ki sngewthuh khambha ia ka kam sain pyrthei ban ia nga u kyrtong. Kumta kila sdang pyniatylli ia ki briew bad pynsngewthuh ia ki paidbah, kumta nga sngewskhem ba ka congress kan wan biang ha ka bor”.
Halor ka jingkynnoh ka UDP ba ka congress ka dei ka bor kaba la kut, une u MP ula ong ba bun na ki briew ka UDP kila kyrshan mynta ia nga.
“Ngam kwah ban kren than. Ki nongialam jong ka UDP ki lah ban ong kat kaba ki mon, ki nongialam ka BJP lane NPP ki lah ban ong katba ki kwah hynrei ki nongkyrshan bad ki paidbah ka Jylla kila sngewthuh ba ka Congress ka dei kaba biang eh” ula bynrap.
